Son illərdə dünyanın bir çox bölgəsində hava şəraitində müşahidə olunan kəskin dəyişikliklər insanları narahat etməyə başlayıb.
Bir həftə öncə güclü yağış və külək, indi isə havanın 30 dərəcəyə qədər yüksəlməsi bu dəyişikliklərin canlı nümunəsidir. İnsanlar arasında artıq “dörd fəsil yoxdur, yalnız qış və yay var” deyimi də məhz bu müşahidələrin nəticəsidir.
Bəs bu vəziyyətin səbəbi nədir?
Biologiya üzrə fəlsəfə doktoru Fikrət Cəfərov “Sherg.az”a bildirib ki, havanın bir həftə öncə yağışlı və küləkli, indi isə bir anda 30 dərəcəyə qədər qalxması iqlim dəyişikliklərinin əlamətlərindən biridir:
“Bu dünyanın bir çox yerində müşahidə olunan bir haldır. Cop29 ərəfəsində iqlimin dəyişilməsi ilə bağlı geniş müzakirələr edildi. Bu bütün dünyada öz təsirini göstərir. Fəsillərin normal keçidi pozulur, yağış rejimi dəyişir (bir bölgədə güclü yağış, digərində quraqlıq), və külək, tufan, istilik dalğaları kimi ekstremal hava hadisələri artır. Qışın mülayim və ya çox sərt soyuq hava ilə keçməsi iqlimlə bağlıdır. Sənaye tullantıları, nəqliyyat, meşələrin qırılması, plastik tullantılar və digər faktorlar atmosferdə balansı pozur. 1 həftə əvvəl dayanmadan yağan yağış tək bu il deyil, 10 il əvvəl də baş vermişdi. Yəni bunlar olan hadisədir. Buxarlanma çoxalaraq atmosferə həddən artıq su yığılır və atmosferdəki su isə yağış, qar ilə nəticələnir. Bunun qarşısını almaq üçün bəzi tədbirlər həyata keçirilməlidir”.
