Bakıda və Abşeron yarımadasında tozlu hava şəraiti müşahidə olunur, hazırda havada tozun miqdarı normadan 1.5 dəfə artıqdır.
Milli Hidrometeorologiya Xidmətindən verilən xəbərə görə, bunu Ətraf Mühitin Çirklənməsinin Monitorinq Qrupunun baş mühəndisi Rəna Allahverdiyeva bildirib.
O qeyd edib ki, müşahidə olunan toz meteoroloji şəraitlə əlaqədar transsərhəd xarakterlidir, cənub-şərq istiqamətli hava axınları vasitəsilə ölkə ərazisinə daxil olub.
"Tozlu hava şəraitinin meteoroloji vəziyyətdən asılı olaraq gün ərzində davam edəcəyi gözlənilir”, - o deyib.
Ekoloq Qorxmaz İbrahimli “Sherg.az”a bildirdi ki, tozlu hava şəraitinin əsas səbəbi hər il olduğu kimi ölkəyə şərqdən daxil olan hava kütlələridir:
“Bu hava kütlələri Türküstan səhralarından toz gətirir. Ümumiyyətlə, ölkəmizə tozlu hava daha çox cənubdan və xüsusilə şərqdən daxil olur. Bundan əlavə, yerli hava şəraiti də mühüm rol oynayır. Belə ki, Abşeron yarımadasında, xüsusilə Bakıda hava onsuz da kifayət qədər çirklidir və tozlu mühit mövcuddur. Bunun əsas səbəbləri şəhərin müxtəlif ərazilərində geniş yayılmış daş mədənləri və intensiv aparılan tikinti işləridir. Bütün bunlar tozlu hava şəraitinin birbaşa mənbəyidir. Müşahidə olunan bu vəziyyət bir neçə gün davam etdikdən sonra aradan qalxacaq. Lakin qeyd etmək lazımdır ki, tozlu hava insanların sağlamlığına ciddi mənfi təsir göstərir. O, xüsusilə bronxial astma xəstələri, ürək-damar xəstələri və ümumən tənəffüs sistemi zəif olan şəxslər üçün təhlükəlidir. Əslində, tozlu hava şəraiti sağlam və qeyri-sağlam insanlar arasında fərq qoymur və hər kəs üçün zərərli hesab olunur. Yəni, bu gün müşahidə olunan tozlu hava kütləsi şərqdən Türküstan istiqamətindən daxil olsa da, ümumi mənzərə dəyişmir. Bakıda demək olar ki, istənilən küləkli havada havadakı tozun miqdarı yüksəlir”.
