İyulun 17-ə olan hava proqnozu açıqlanıb. Ölkə ərazisində hava şəraiti əsasən yağmursuz keçib, lakin 16-sı gündüz saatlarında dağlıq ərazilərdə (Xaltan , İsmayıllıda 1 mm-dək) qısa müddətli az yağış yağıb.
Havanın maksimal temperaturu Bakıda və Abşeron yarımadasında 39, Aran rayonlarında 38, dağlıq rayonlarda 30, Naxçıvan MR-da isə 41 dərəcəyədək isti qeydə alınıb.
Qeyd edək ki, Azərbaycan Respublikasının Əmək Məcəlləsinin 233-cü maddəsinə əsasən, havanın temperaturu azı 41 dərəcə selsidən çox olanda açıq şəraitli iş yerlərində işlər dayandırılmalıdır.
Son günlərdə havalar çox isti keçir. Havanın isti olması ürəyi zəif və açıq havada işləyən insanları narahat edir.
Lənkəran Dövlət Universitetinin baş müəllimi, meteoroloq Cavidan Əliyev “Sherg.az”a deyib ki, bu gün Bakıda havanın temperaturu 31 dərəcə təşkil edib, hazırda mülayim şimal-qərb küləyi əsir:
“Lakin regionlarda 36-38 dərəcəyədək qalxıb. Bu tsiklonun isti sektoru ilə bağlı olub. Lakin yaxın günlərdə Aralıq dənizi tsiklonun Şimali Qafqaza hərəkət etməsindən ölkə ərazisinin bəzi yerlərində, eləcə də Bakıda arabir güclənən şimal və şimal-qərb küləyinin əsəcəyi gözlənilir. Dağlıq ərazilərində şimşək çaxacağı, qısamüddətli yağış yağacağı gözlənilir. Havanın maksimal temperaturu +30 +33 dərəcə təşkil edəcək.
Lakin ayın 20-dən başlayaraq güclü istilik dalğası Bakıda temperaturu 38-41 dərəcəyədək qaldıracağı, Aran rayonlarında isə temperaturun 40-44 dərəcəyədək şıddətlənəcəyi gözlənilir. Dağlıq rayonlarda 33-37 dərəcəyədək yüksələcək”.
Kəmalə Vəliyeva
