"Karina" tropik fırtınası bazar günü Sakit okeanda güclənərək birinci dərəcəli qasırğaya çevrilib. Sinoptiklərin məlumatına görə, qasırğa bu həftə üçüncü dərəcəyədək güclənə bilər.
Oxu.Az xəbər verir ki, bu barədə ABŞ Milli Qasırğa Mərkəzi məlumat yayıb.
"Karina"nın maksimal davamlı küləyinin sürəti saatda 80 milə (130 kilometrə) çatıb. Bu göstərici ilə fırtına birinci dərəcəli qasırğa hesab olunur.
Qasırğa Meksikanın Aşağı Kaliforniya yarımadasının cənub ucundan təxminən 820 mil (1 325 kilometr) cənub-qərbdə yerləşir. "Karina" saatda 15 mil (24 kilometr) sürətlə şimal-qərbə, Sakit okeanın daha açıq hissələrinə doğru hərəkət edir.
"Karina"nın qurudan uzaq qalacağı gözlənilir. Bununla belə, Qasırğa Mərkəzi qasırğanın yaratdığı dalğaların Meksikanın cənub-qərb sahillərində və Aşağı Kaliforniya yarımadasının bəzi hissələrində təhlükəli dalğalanmalara və güclü əks axınlara səbəb ola biləcəyi barədə xəbərdarlıq edib.
