Azərbaycan Tarixçiləri İctimai Birliyinin sədri Mehri Xanbabayeva, tarix üzrə fəlsəfə doktoru Fərəh Hüseyn, tarix üzrə fəlsəfə doktoru, Dövlət Mükafatı laureatı İradə Məmmədova və tarix elmləri doktoru, Dövlət Mükafatı laureatı Güntəkin Nəcəfli görkəmli tarixçi alim Yaqub Mahmudova doğum günü münasibətilə təbrik məktubu ünvanlayıblar.
“Tehsil365” xəbər verir ki, təbrik məktubunda deyilir:
“Dəyərli ustadımız Yaqub müəllim!
Sizin müstəqil respublikamızın ilk “Təhsil Qanunu”nun hazırlanması və çox çətinliklər bahasına qəbul etdirilməsi; Azərbaycan təhsil sistemində bakalavr və magistr sisteminin tətbiqi; orta məktəblər üçün tarix sahəsində ilk proqramların hazırlanmasında gördüyünüz xidmətləri - heç zaman unutmarıq!
Sizi BDU-nun Tarix fakültəsində həyata keçirdiyiniz mühüm islahatlarla: yeni ixtisasların və mühüm mərkəzlərin açılması; böyük çətinliklə “Türk odası”nın qurulması; xaricdəki ali məktəb ocaqları ilə əlaqələrin yaradılması; Azərbaycan Xalq Cümhuriyyətinin və Qarabağın tarixinə dair mükəmməl əsərlərin ortaya qoyulması ilə - tanımağa başladıq!
Sizi AMEA-nın Tarix İnstitutunda: itirilmiş torpaqların tarixinin (İrəvan xanlığı, Dərbənd, Tiflis əmirliyi, Borçalı, Zəngəzur və s.) tədqiqi; 40 illik fasilədən sonra “Tarix İnstitutunun elmi əsərləri”nin bərpası; “Azərbaycan tarixi ilk mənbələrdə” layihəsi; Azərbaycan xalqına qarşı ermənilərin həyata keçirdiyi soyqırımlarının araşdırılması; “Azərbaycan tarixi atlası”nın işıq üzü görməsi; “Azərbaycan Respublikasının tarixi” və s. kimi fundamental əsərlərin hazırlanması ilə - daha yaxından tanıdıq!
Sizin Qərbi Azərbaycan tarixinin araşdırılması istiqamətində gördüyünüz işlərin: “İrəvan xanlığı: Rusiya işğalı və ermənilərin Şimali Azərbaycan torpaqlarına köçürülməsi”, “İrəvan xanlığı: Erməni vandallarının yox etdiyi Xan sarayı”, “İrəvan xanlığı: Erməni vandallarının yox etdiyi İrəvan məscidləri”, “İrəvan xanlığının paytaxtı - İrəvan şəhəri”, “Erməni vandallarının yox etdiyi İrəvan qalaları”, “İrəvan xanlığının əhalisi” və s. - canlı şahidi və yaxından iştirakçısıyıq!
Sizin “Ata yurdu hər bir kəs üçün sadəcə olaraq onun doğulduğu kənd deyil, bizim hər birimizin, xüsusilə də Azərbaycan gəncliyinin beyninə həkk olunmalıdır ki, onun Ata yurdu bütöv Azərbaycandır. Əgər bütöv Azərbaycan yoxdursa, Azərbaycanın müstəqilliyi yoxdursa, dövlətin yoxdursa, sənin o doğulduğun kənd heç nədir. Böyük yurdun qədrini bilmədən kiçik yurdda yaşamaq mümkün deyil. Böyük yurdu qorumadan, böyük yurdun mənafeyi uğrunda həlak olmağı bacarmadan kiçik yurdu qoruyub saxlamaq olmaz!” şüarınızla - hər zaman qürur duyuruq!
Yaqub müəllim, Sizi doğum gününüzlə bağlı təbrik edir, Sizə möhkəm can sağlığı və yeni-yeni uğurlar arzulayırıq!”
