“Qarabağ”ın futbolçusu millisinin qələbəsində iştirak etdi

“Qarabağ”ın futbolçusu Aleksey Kaşuk Ukrayna millisinin heyətində növbəti oyununa çıxıb.

QOL.az xəbər verir ki, 26 yaşlı yarımmüdafiəçi Gürcüstanla qarşılaşmada ikinci hissədə meydana daxil olub.

Kaşuk matçın 64-cü dəqiqəsində Qennadi Sinçuku əvəzləyib. Beləliklə, “Qarabağ”ın futbolçusu görüşün əsas vaxtının son 26 dəqiqəsində və hakim tərəfindən əlavə olunmuş vaxtda meydanda olub.

Ukrayna millisi qarşılaşmadan 1:0 hesablı qələbə ilə ayrılıb.

Görüş UEFA Millətlər Liqasının B Liqasının 2-ci qrupunun 6-cı turu çərçivəsində Slovakiyanın Koşitse şəhərində keçirilib. Oyunda yeganə qolu 1-ci dəqiqədə Danilo Sikan vurub.

Qeyd edək ki, bu, Kaşukun Ukrayna millisində ikinci oyunu olub.