Almaniya Xarici İşlər naziri Hayko Mas ABŞ-ın təhdidlərinin və hərbi aksiyalarının İranın Yaxın Şərq siyasətini dəyişməyə kömək etmədiyini bildirib.
APA-nın xəbərinə görə, Almaniya XİN rəhbəri “Bild am Sonntag” qəzetinə müsahibəsində deyib ki, xaricdən təsir nəticəsində İranda rejim dəyişikliyinin avtomatik situasiyanı yaxşılaşdıracağını düşünmək düzgün deyil.
H. Mas İraqın timsalında bunun uğursuzluqla nəticələndiyini qeyd edib: “Avropa İttifaqı vəziyyəti gərginləşdirmək əvəzinə diplomatiyaya üstünlük verir, İranın nüvə proqramı ilə bağlı Hərtərəfli Birgə Fəaliyyət Planını dəstəkləyir. İranla razılaşma olmasaydı, artıq Tehran atom bombasına malik idi. Biz mütləq buna mane olmalıyıq ”.
Xatırladaq ki, yanvarın 3-də gecə Bağdad aeroportu yaxınlığında ABŞ-a məxsus pilotsuz uçuş aparatından endirilən zərbələr nəticəsində İran İslam İnqilabı Keşikçiləri Korpusunun xüsusi təyinatlı “Qüds” Qüvvələrinin komandanı general Qasım Süleymani və İraqın şiə könüllülərdən ibarət “Həşdi-Şaabi” qruplaşmasının komandir müavini Əbu Mehdi Əl-Mühəndis də daxil olmaqla, 10 nəfər öldürülüb.
İran buna cavab olaraq ABŞ-ın İraqdakı iki hərbi bazasına raket zərbələri endirib. ABŞ tərəfi itki verməyib.
