Rusiya beynəlxalq normalara uyğun sivil dövlətlərin etməli olduğu hərəkətləri etməlidir
"Prezident İlham Əliyev Rusiyanın açdığı atəş nəticəsində qəzaya uğramış təyyarə ilə bağlı AzTV-yə müsahibəsində çox aydın şəkildə məsələlərə münasibət bildirdi".
Bunu "Sherg.az"a açıqlamasında millət vəkili Azər Badamov deyib.
Deputat bildirib ki, dövlət başçımız qəzanın əsl səbəblərini gizlətmə cəhdlərinə toxunaraq Rusiyadan tələblərimizi bir daha bəyan etdi:
"Qeyd olunduğu kimi birinci tələbimiz olan Rusiyanın üzr istəməsi artıq prezident V.Putin tərəfindən dövlət başçımızla telefon danışığı zamanı bildirildi. Digər tələblərimiz isə qəzanın baş verməsində cinayət əməlləri ilə bağlıdır. Təbii ki, təyyarəyə səhvən atəş açılsa da idarəetməni itirmiş hava gəmisinin Qroznıya yaxın ehtiyat hava limanlarına istiqamətləndirilməməsi, radar siteminin iflic edilməsi çoxlu suallar doğurur. Qara qutu oxunandan sonra bütün məqamlara aydınlıq gətirləcək".
Parlament üzvü vurğulayıb ki, Rusiya beynəlxalq normalara uyğun sivil dövlətlərin etməli olduğu hərəkətləri etməlidir:
"Cinayətkarlar cəzalandırılmalı, xəsarət alanlara və Azərbaycana təzminatlar ödənilməlidir. Hazırda aparılan istintaqın gedişatında qəzanın baş verməsinə səbəbkar olan şəxslərin dairəsi müəyyənləşdirlir. Nəticədə bütün tələblərin icra olunacağını hesab edirəm".
