Bakıda ayı, dovşan, maral ətindən hazırlanan məhsullar satılır.
ATV xəbər verir ki, Azərbaycan Qida Təhlükəsizliyi Agentliyinin (AQTA) əməkdaşları plandankənar yoxlama zamanı paytaxtın Nərimanov rayonundakı mağazaların birində ayı, dovşan, maral ətindən hazırlanmış konservlər aşkarlayıblar.
Mağaza sahibi isə AQTA-nın əməkdaşlarını görüb, dükanı bağlayaraq ərazidən uzaqlaşıb.
Azad İstehlakçılar Birliyinin rəhbəri Eyyub Hüseynov "Sherg.az"a bildirib ki, Azərbaycanda heç bir ətin satışına qadağa yoxdur:
“Yalnız tələb ondan ibarətdir ki, satan şəxs yazsın ki, bu hansı heyvanın ətidir. Mən bu vəziyyəti anormal hesab edirəm. Yəni əslində eşşək, pişik və it ətinin də satılmasında qadağa yoxdur. Mütləq qida təhlükəsizliyi haqqında qanunda və yaxud da Nazirlər Kabinetinin qərarında Azərbaycanda istifadə olunmayan və yeyilməyən ətlərin siyahısı olmalıdır. Azad İstehlakçılar Birliyində bir kitab var və 1963-cü ildə dərc olunub. Həmin kitab 15 SSRİ respublikaları arasında, o cümlədən SSRİ-nin təsiri altında olan Avropa dövlətlərində ətlərin qiymətləri, adları barədə məlumatlarqeyd edilib. Tək Azərbaycanda eşşək əti yeməli hesab olunurdu. Sonra biz öyrəndik ki, o vaxt bunu ermənilər yaradıb. Yəni bizi vəhşi bir xalq kimi SSRİ vaxtından təqdim edirlər. Ona görə də mütləq qadağan olunan və yaxud yeyilməyən ətlər barədə müəyyən qərar olmalıdır. Çox təəssüf ki, bu yoxdur və istənilən əti satmaq heç bir cinayət məsuliyyəti törətmir. Azərbaycanda müxtəlif ətlər satılır. Hətta ölkəmizdə ilk dovşançılıq təsərrüfatı var və Salyan rayonundadır. Onlar çox mükəmməl bir təsərrüfatdır. Dovşan ətinin xeyirli olmasını təbliğ edirlər. Məndə olan məlumata görə, Bakının marketlərinə çıxarılır, və üzərində də qeyd edilir ki, bu dovşan ətidir. Lakin ayı və eşşək əti yeyilməyib. Ancaq maral əti yeyilən ət hesab olunur, yəni haram hesab olunmur. Bu normaldır və istehlakçıların seçim hüququ var. Bu şərtlə ki, Qida Təhlükəsizliyi Agentliyi orada yoxlama aparmalı, malın təhlükəsizliyi təmin olunmalı və daha sonra bazara çıxarıla bilər. Əgər Qida Təhlükəsizliyi Agentliyinin icazəsi varsa, deməli təhlükəsizdir. Ümumiyyətlə, təhlükəsiz qida nədir deyə axtarsanız onun cavabını tapmayacaqsınız. Ancaq qida təhlükəsizliyinin cavabını tapacaqsınız”.
