Təlimlər təkcə hərbi deyil, eyni zamanda siyasi mesajdır
Azərbaycanda keçirilən “Araz-2025” birgə təliminə İrandan cəlb olunan heyətin rəhbəri və digər iştirakçılar ölkəmizə səfər edib. Müdafiə Nazirliyindən bildirilib ki, hər iki ölkənin təlim rəhbərləri və digər yüksək səviyyəli üzvləri arasında görüş keçirilib. Görüşdə təlimin məqsədi, ssenarisi və keçiriləcəyi ərazi, hazırlıq prosesi, təhlükəsizlik qaydaları, həmçinin müxtəlif mərhələlər üzrə icra olunacaq tapşırıqlar barədə brifinq təqdim olunub. Qeyd edək ki, “Araz-2025” birgə təlimi işğaldan azad edilmiş ərazilərdə mayın 21-dək davam edəcək.
Milli Cəbhə Partiyasının sədr müavini Tural İrfan "Şərq"ə açıqlamasında deyib ki, dövlətimizin yürütdüyü siyasət hər zaman sağlam qonşuluq və dostluq ənənələrinə sadiq qalmaq, mədəni, iqtisadi-ticari əlaqələrin inkişafını hədəf götürüb. Ekspert vurğulayıb ki, İranla zaman-zaman ziddiyətlər meydana gəlib:
"Çünki Tehrandan haqsız ittihamlara məruz qalmışıq. Lakin İran Prezidenti Məsud Pezeşkianın Azərbaycana səfəri çərçivəsində ölkələrimizin arasındakı münasibətlərin istiləşməsi müşahidə olunur. Təbii ki, qonşularla hər zaman isti münasibətlərin olması ölkələrimizin inkişafında böyük əhəmiyyət kəsb edir. Eyni zamanda təhlükəsizlik məsələlərində mühüm rol oynayır. Bu baxımdan birgə təlimlərin keçirilməsi də təbiidir. Bununla Azərbaycan öz sağlam, dayanıqlı siyasətini ortaya qoymuş olur. Regionda sülh və sabitliyin davamlı olması, xarici təhdidlərin minimuma endirilməsi üçün davamlı tədbirlər görülür. Birgə təlimlərin keçirilməsi və digər əlaqələrin inkişaf etdirilməsi hər iki ölkə arasında yenidən sağlam əlaqələrin davamlı olmasına aparan vəsilə sayıla bilər".
