Bizim yaşıl enerji gündəliyimiz çox genişdir. Azərbaycan neft və qaz ölkəsi olmaqla yanaşı, investorlarla bərabər məhz yaşıl enerjiyə sərmayə qoyub. Bu da bizim məsuliyyətimizi nümayiş etdirir.
Bu fikirləri Prezident İlham Əliyev 30-cu “Caspian Oil and Gas”, 13-cü “Caspian Power” və 30-cu “Baku Energy Forum”un rəsmi açılış mərasimində çıxışında səsləndirib.
Dövlət başçısı, həmçinin bildirib ki, bütün bu yaşıl enerji potensialımız nəticəsində biz Azərbaycanın elektrik enerjisinə artan tələbatını məhz bərpaolunan enerji hesabına təmin edəcəyik.
Neft sahəsi üzrə tanınmış ekspert, Neft Araşdırmaları Mərkəzinin rəhbəri İlham Şaban “Sherg.az”a bildirib ki, Azərbaycan hələ ki, böyük yaşıl enerji mənbəyinə əsaslanan bir stansiya tikib:
“Onun adı isə Qaradağ 230 MVt-lıq Günəş Elektrik Stansiyasıdır. Bu layihə ölkənin bərpaolunan enerji strategiyasında mühüm mərhələ hesab olunur. Stansiyanın tikintisinə 262 milyon ABŞ dolları həcmində sərmayə qoyulub. Azərbaycanın 2030-cu ilə qədər üç-dörd milyard kilovat-saat yaşıl enerjini ixrac etmə planı var. Bu hədəf ölkənin “yaşıl enerji zonası” konsepsiyasına uyğun şəkildə Qarabağ və Şərqi Zəngəzur bölgələrinin potensialı nəzərə alınmaqla müəyyən edilib. Bununla yanaşı, Azərbaycanda külək enerjisi layihələri, xüsusilə də Xəzər dənizində yerləşdirilməsi nəzərdə tutulan dəniz külək stansiyaları da gündəmdədir. Bu təşəbbüslər regionda alternativ enerjiyə keçidin liderliyini ələ almağa yönəlib. Lakin nəzərdə tutulan ixrac hədəflərinin gerçəkləşməsi üçün texnoloji, maliyyə və infrastruktur baxımından ciddi hazırlıq tələb olunur. Hazırkı şəraitdə Azərbaycanın yaşıl enerji sahəsində apardığı işlər müsbət qiymətləndirilsə də, reallıqda bu planların tam yerinə yetirilib-yetirilməyəcəyini yalnız zaman və praktika göstərəcək. Dövlətin davamlı siyasi iradəsi və investor marağının qorunması bu istiqamətdə əsas rol oynayacaq”.
