Avropada artan gərginlik fonunda Böyük Britaniya öz silahlı qüvvələrinin döyüşə hazırlığını təmin etmək üçün müdafiə sahəsinə investisiyaları artırır.
Oxu.Az-ın TASS-a istinadən xəbərinə görə, bu barədə Birləşmiş Krallığın Baş naziri Kir Starmer Qlazqoda mətbuat konfransında çıxışı zamanı məlumat verib.
"Biz Silahlı Qüvvələrimizin əsas məqsədi kimi döyüş hazırlığı rejiminə keçirik", - deyə o bildirib.
Starmer əlavə edib ki, ölkənin təhlükəsizliyi NATO müttəfiqləri ilə tərəfdaşlığa əsaslanacaq.
O bildirib ki, London heç vaxt təkbaşına mübarizə aparmayacaq.
"Bizim müdafiə sahəsində siyasətimiz həmişə ilk növbədə NATO yönümlü olacaq", - deyə o əlavə edib.
Starmer qeyd edib ki, alyans Böyük Britaniyanın "strateji gücünün fundamental mənbəyidir".
Bundan əlavə, o bildirib ki, London "müharibə vaxtı sürəti" ilə öz silahlı qüvvələrinə yeniliklər tətbiq etmək niyyətindədir. Kir Starmerin sözlərinə görə, o, Britaniya qoşunlarını "2035-ci ilə qədər on qat daha ölümcül" etməyi planlaşdırır.
