Ermənistan parlamentinin sədri Alen Simonyan Gürcüstana qeyri-rəsmi səfər edib.
Teleqraf-ın yerli bürosu xəbər verir ki, Gürcüstan parlamentinin sədri Şalva Papuaşvili erməni həmkarını Telavidə qəbul edib.
Görüşdə Gürcüstan-Ermənistan əməkdaşlığı və parlamentlərarası əlaqələr müzakirə olunub. Tərəflər, həmçinin Cənubi Qafqazda cari geosiyasi dəyişiklikləri və bölgədə mövcud vəziyyəti müzakirə ediblər.
Parlament sədrləri Cənubi Qafqazda sülh, sabitlik və etimadın möhkəmləndirilməsi istiqamətində əməkdaşlığa hazırlıqlarını təsdiqləyiblər, Qafqazın tranzit dəhlizlərinin potensialından istifadə imkanlarını vurğulayıblar.
Ş.Papuaşvili Ermənistanın Avropa İttifaqı ilə dialoqu dərinləşdirmək səylərini alqışlayıb, Gürcüstanın Ermənistanın Avropa perspektivini dəstəklədiyini və bu sahədə təcrübə mübadiləsinə hazır olduğunu bildirib.
