Təəccüblü məqam odur ki, Covid keçirməmiş şəxslərdə belə beyin qocalmasının sürəti ciddi şəkildə artıb
Alimlər bildirirlər ki, Covid-19 pandemiyasının yaratdığı qeyri-müəyyənlik və uzunmüddətli təcrid beyin sağlamlığına ciddi təsirlər göstərib.
Sherg.az xəbər verir ki, Nottingem Universiteti tərəfindən aparılan araşdırmada 15 min 334 sağlam insanın məlumatları əsasında hazırlanmış bir beyin qocalması modeli istifadə edilib. Bu model 996 sağlam şəxsin beyin müayinələrinə tətbiq olunub. İştirakçıların yarısının müayinələri pandemiyadan əvvələ, digər yarısının isə həm pandemiyadan əvvəlki, həm də sonrakı dövrə aiddir.
Araşdırmanın nəticələrinə görə, pandemiya dövründə insanların beyinləri orta hesabla 5 ay yarım daha sürətli qocalıb. Bəzi şəxslərdə bu fərq 20 aya qədər yüksəlib. Bu sürətlənmiş qocalma, şəxsin Covid-19-a yoluxub-yoluxmamasından asılı olmayaraq müşahidə olunub.
Lakin yaş artdıqca Covid-19 keçirmiş şəxslərdə beyin qocalmasının daha da sürətləndiyi aşkar edilib. Eyni zamanda, kişilərdə və sosial baxımdan dezavantajlı qruplarda bu təsirin daha aydın şəkildə göründüyü qeyd olunub.
“Daily Mail”də yer alan xəbərə görə, iştirakçıların idrak qabiliyyətini qiymətləndirmək üçün aparılan testlər, xüsusilə Covid-19 keçirmiş şəxslərdə zehni çeviklik və emal sürətində azalma olduğunu göstərib.
Dr. Əli-Rza Mohammadi-Nejad, “Nature Communications” jurnalına verdiyi açıqlamada bildirib:
“Ən çox təəccübləndiyim məqam o oldu ki, Covid keçirməmiş şəxslərdə belə beyin qocalmasının sürəti ciddi şəkildə artmışdı. Bu hal pandemiya təcrübəsinin beyin sağlamlığımıza nə qədər təsir etdiyini göstərir”.
