Rusiyanın hələ ki, Azərbaycanla münasibətləri normallaşdırmaq fikri yoxdur
Kreml Rusiyanın müxtəlif şəhərlərində Azərbaycan diasporuna rəhbərlik edən şəxsləri bir neçə məqsədlə dəyişməyə başlayıb. Yeni diaspor rəhbərləri ana vətənlərinə bağlı olmamalı, Kremlin təlimatları əsasında fəaliyyət göstərməlidirlər. Hazırda Rusiya-Azərbaycan münasibətlərində gərginlik səbəbi ilə Kreml diaspor rəhbərlərindən Rusiyanın mövqeyinin müdafiəsini tələb edəcək.
Ekspertlərin fikrincə, əslində, Kremli Azərbaycan diasporalarının iki ölkə arasında əlaqələrin inkişafına töhfə verməsi, həmin ölkələrin qanunvericiliyinə uyğun fəaliyyət göstərməsi maraqlandırmır. Moskvanın əsas məqsədi Rusiya hakimiyyətinə loyallıq və diaspora rəhbərlərinə verilən tapşırıqların yerinə yetirilməsini təmin etməkdir. Rusiya bu tələbləri yerinə yetirməyəcək diaspora rəhbərlərini başqaları ilə əvəzləyəcək.
Politoloq Elxan Şahinoğlu Sherg.az-a deyib ki, Moskva bu yolla soydaşlarımızı ana vətəndən qoparmağa və Rusiyada azərbaycanlılar arasında Bakının siyasətinin tənqidçilərini artırmağa çalışacaq. Ekspertin fikrincə, Kremlin ikinci məqsədi soydaşlarımızın ana vətəndəki ailələrinə pul köçürmələrinə nəzarəti gücləndirmək olacaq:
"Rusiyanın hələ ki, Azərbaycanla münasibətləri normallaşdırmaq fikri yoxdur. Əksinə, media ruporları vasitəsilə hədələyici açıqlamalarının sayını artırmaqla məşğuldur. Rusiyanın dövlət televiziya kanalının aparıcısı Solovyovun Azərbaycana qarşı artan təxribatçı açıqlamaları bunun sübutudur. Kreml rus filosof və politoloq Aleksandr Duqini də "hərəkətə" gətirib. Onun sözlərinə görə, Rusiyada yaşayan miqrantlar, o cümlədən soydaşlarımız Rusiya cəmiyyəti üçün "ən çox toksik" qruplar hesab edilə bilər. Duqinin fikrincə, Rusiyada qalmaq üçün yeganə yol assimilyasiya və ölkənin mədəni kodunu qəbul etməkdir. Nədir bu "mədəni kod"? Duqin Kremlin mirqantlardan loyallıq və Rusiyanın müdafiəsində iştirak tələbinə birini də əlavə edib - "pravoslavlığı qəbul edin". Görəsən, Duqinin tələbi Rusiyada yaşayan 20 milyon müsəlmana da aiddirmi?! Rusiyanın heç bir rəsmisi Duqinin təxribatçı açıqlamasını tənqid etmirsə, bunun xalqlar arasında nifaqa səbəb olacağını söyləmirsə, deməli elə Kremldə oturanlar da belə düşünürlər".
