Türkiyə hazırkı İsrail hökuməti - Baş nazir Binyamin Netanyahunun rəhbərlik etdiyi kabinetlə heç bir əlaqə qurmaq niyyətində deyil.
Teleqraf xəbər verir ki, bu barədə Türkiyənin “Hürriyet” qəzeti mənbələrə istinadla məlumat verib.
Nəşr qeyd edib ki, İsraildə yeni hökumət formalaşacağı təqdirdə, Türkiyə rəhbərliyi üçün əsas meyarlar həmin hökumətin ideoloji yönümü və apardığı siyasət olacaq.
“Hürriyet” bu mövqeyi ABŞ-nin Ankaradakı səfiri və prezidentin Suriya üzrə xüsusi nümayəndəsi Tomas Barakın son açıqlamalarına cavab kimi təqdim edib. Barak söyləmişdi ki, Türkiyə və İsrail bir-biri ilə vuruşmayacaq və iki ölkə arasında Xəzər dənizindən Aralıq dənizinədək uzanan bölgədə əməkdaşlıq mümkündür.
Qəzetin yazdığına görə, amerikalı rəsmilər Barakın sözlərinin sadəcə faktın təsdiqi deyil, Vaşinqtonun məqsədli siyasətinin ifadəsi olduğunu düşünürlər. Onların fikrincə, ABŞ Türkiyə və İsrail arasında silahlı toqquşmanın qarşısını almağa və Ankaranın gələcəkdə İsraildə formalaşacaq hökumətlə təmaslarını bərpa etməsinə çalışır.
Qəzetin şərhçisi Hande Fırat deyib: “Barakın Xəzərdən Aralıq dənizinədək uzanan regionda əməkdaşlıqdan danışması təsadüfi deyil. Bu coğrafi xətt Azərbaycan, Türkiyə və İsrail arasında enerji və ticarət dəhlizinin yaradılmasına işarə edə bilər”.
Xatırladaq ki, 2024-cü ilin may ayından etibarən Türkiyə İsraillə bütün ticarət münasibətlərini dayandırıb. İsrail bayrağı altında üzən və ya İsrailə məxsus (habelə onunla əlaqəli) olan gəmilərin Türkiyə limanlarına daxil olmasına qadağa qoyulub.
