Antalya Böyükşəhər Bələdiyyəsi bu il ikinci dəfə Beynəlxalq Antalya Yörük Türkmən Festivalını təşkil edib. 5 noyabr tarixinədək davam edəcək festival köç duası və təmsili yörük köçü ilə başlayıb.
Sherg.az xəbər verir ki, köç yürüşü zamanı yöruklər öz mədəniyyətlərini əks etdirən geyimləri və karvanları ilə rəngarəng görüntülər yaradıblar. Xalq oyunları nümayişlərinin ardından Antalya Böyükşəhər Bələdiyyə başçısı Prof. Muhittin Böcek meydandakı Milli Yüksəliş Abidəsi önünə əklil qoyub. İstiqlal Marşı oxunduqdan sonra Karaalioğlu Parkına qədər Yörük köçü baş tutub. Antalya küçələrində coşğu yaşanıb. Festivalda Türk dünyasından gələn qonaqlar iştirak ediblər.
Qonaqlar arasında Azərbaycan Türk Ocağının başqanı, tarix elmləri üzrə fəlsəfə doktoru Akif Aşırlı da olub. Akif Aşırlı Antalya Türk Ocağı başqanı Abdullah Uysalın dəvəti ilə Yörük Festivalına qatılıb.
Azərbaycan Türk Ocağının sədri Akif Aşırlı bildirib ki, dünyaya böyük mədəniyyətlər bəxş edən, dünyanın müxtəlif coğrafiyalarında yaşayan türklərin qədim adət-ənənələrini izləmək insana xoş bir duyğu, könül rahatlığı verir:
"Festival dünəndən başlayıb, sabah yekunlaşır. Antalyada yaşayan soydaşlarımızı festivala qatılmağa dəvət edirik".
