Brüssel görüşündən sonra Ermənistan-Azərbaycan münasibətlərində normallaşma ehtimalı artmaqdadır
Brüssel görüşünün yekun nəticəsinə görə, Avropa İttifaqı Qarabağdakı erməni əhalisinin ərzaq təminatının Ağdamdan çatdırılmasını dəstəkləyib. Bu, erməni əhalisinin reinteqrasiyasına nail olmaq baxımından həlledici amil ola bilər. Yəni Azərbaycan məhsulları Xankəndiyə daşınacaq və sonrakı addımlara yol açılacaq. Hazırda xəstələrin Beynəlxalq Qırmızı Xaç Komitəsi vasitəsilə Ermənistana aparılması üçün Laçın yolundan şərait yaradılır. Lakin ərzaq təminatı BQXK-nın İrəvandakı ofisə yox, Bakıdakı ofisinə tabe olmasını, xəstələrin də Azərbaycan xəstəxanalarına gətirilməsini şərtləndirəcək. Beləliklə, erməni əhalisinin yaşadığı ərazilərdə mərkəzi hakimiyyətin bərpasına nail ola biləcəyik. Hərçənd, Brüssel razılaşması və Aİ-nin Ağdam marşrutunu dəstəkləməsi məsələnin praktik həlli demək deyil. Separatçılar müqavimət göstərir və erməni əhalisini nəzarətdə saxlayırlar. Lakin mümkün təxribatların prosesi əvvəlki vəziyyətə qaytaracağı - Laçın postunun yüklər üçün açılmasına səbəb olacağı ehtimalı azdır.
Millət vəkili Naqif Həmzəyev "Sherg.az"a açıqlamasında bildirib ki, Brüssel görüşündən sonra Ermənistan-Azərbaycan münasibətlərində normallaşma ehtimalı artmaqdadır. Deputatın sözlərinə görə, ancaq istənilən halda İrəvan rəsmi Bakının irəli sürdüyü həll yollarını qəbul etməkdə çətinlik çəkir:
"Azərbaycan problemin uzunmüddətli və daimi həllini istəyir. Rəsmi Bakı öz mövqeyində qətidir. Biz öz ərazimizdə yaşayan erməni əhalinin reinteqrasiyasına ən qısa zamanda nail olmaq istəyirik. Prosesin uzadılmasına və qeyri-müəyyən vaxtadək davam etdirilməsinə razılıq vermirik. Beynəlxalq Qırmızı Xaç Komitəsinin İrəvan ofisinin Azərbaycan ərazisində fəaliyyət göstərməsi heç də qəbuledilən deyil. Çünki faktiki olaraq Azərbaycanda eyni təşkilatın ofisi fəaliyyət göstərir. Azəbaycan öz ərazilərində məhz Bakı ofisinə tabe olan şəxslərin çalışmasında maraqlıdır. Belə olan təqdirdə təbii ki, bu xidmətdən istifadə edəcək erməni əhali Azərbaycan xəstəxanalarından, təklif etdiyimiz humanitar yardımlardan istifadə etmək yolunu tutacaq. Separatçılar Qarabağdakı erməni əhalinin qorxu və təhdid altında saxlanmasına son verməlidir. Azərbaycanın təklif etdiyi bütün həll yolları qeyd-şərtsiz qəbul olunmalıdır. Qanunlarımıza tabe olmaqla dinc şəraitdə yaşamaq istəyən ermənilər torpaqlarımızda rahatlıqla yaşayacaqlar. Azərbaycan əhalisi ilə eyni hüquqlara malik olmaqla öz yaşamlarını davam etdirəcəklər. Dövlətimiz sadəcə sözdə deyil, əməldə də bunu sübut edir. Laçın yolu üzərində nəzarət-keçid məntəqəsi qurulduqdan sonra da humanitar məqsədlərlə bu yolun istifadəsində heç bir qadağa, maneə olmayıb. Ancaq separatçıların və bəzi beynəlxalq təşkilatların bu yoldan başqa məqsədlər üçün istifadəsinə imkan verilməyib və verilməyəcək".
Parlament üzvü bəyan edib ki, Azərbaycan öz məqsədlərinə çatdıqca, 2025-ci ildə Rusiya sülhməramlı kontingentinin də ərazimizi tərk etməsinin şahidi olacağıq:
"Dövlətimiz faktiki olaraq 2025-ci ilədək bu prosesləri yekunlaşdırmaq istəyir. Əgər Ermənistan tərəfi təxribatlara son qoyarsa və danışıqları davam etdirərsə, 2024-cü ilə qədər, bəlkə də bu ilin sonuna doğru sülh anlaşmasını da imzalamaq mümkün olar. Hətta gələn il ərzində Zəngəzur dəhlizinin işə düşməsini də reallaşdıra bilərik. Azərbaycan öz mövqeyində qətidir və erməni əhalinin reinteqrasiyasında maraqlıdır. Buna nail olmaq üçün bütün mümkün variantları işə salırıq. Beynəlxalq ictimaiyyət də bu addımlarımızı dəstəkləyir".
