“Vətəndaşın düşüncəsi bağçadan, məktəbdən, universitetdən dəyişməlidir”
“Prezident dəfələrlə qeyd edib ki, çirkin əməllərdən əl çəkmək lazımdır və məmurlar vətəndaşlarla yaxın olmalı, bütün fəaliyyətləri onlara xidmət etməkdir”
“Əhalinin malına, puluna, kartına göz dikməkdən uzaq durmalıdırlar”
Şəmkir Rayon İcra Hakimiyyətində Dövlət Təhlükəsizliyi Xidməti (DTX) tərəfindən hüquq-mühafizə orqanları tərəfindən əməliyyat keçirilib. Əməliyyat nəticəsində icra başçısının sabiq birinci müavini, hazırkı təhsil şöbəsinin müdiri Qüdrət Əliyev, baş memar İlqar Quliyev, şəhər icra nümayəndəsi Pərviz İbrahimov və Mənzil-Kommunal İstismar idarəsinin rəisi Teymur Hacıyev saxlanılıb.
Şəmkir Rayon İcra Hakimiyyətinin başçısı Alimpaşa Məmmədovun da saxlanıldığı bildirilir. A.Məmmədov bu gün DTX tərəfindən Bakıya gətirilib.
Məmurların vəzifələrindən sui-istifadə hallarının xalqımıza yaraşmadığını deyən Azərbaycan Milli Qeyri-Hökumət Təşkilatları Forumunun (MQF) prezidenti Rauf Zeyni “Sherg.az”a bildirib ki, cənab Prezident tərəfindən bütün istiqamətlərdə ciddi islahatlar aparılır:
“Hər birimiz bu islahatları dəstəkləyirik. Vətəndaş cəmiyyəti və qeyri hökumət təşkilatları (QHT) olaraq illərdir ki, korrupsiya, rüşvətxorluq, məmur özbaşınalığı və islahatlara əngəl olan digər mənfi hallarla mübarizə aparırıq. 20 ildən çoxdur ki, seminar və treninqlər keçiririk və qeyd edirik ki, düşüncəni dəyişmək lazımdır.
Düşüncə dəyişməsə, yenə də məmurların və vəzifəli şəxslərin həbsi olacaq. Ona görə də vətəndaşın düşüncəsi bağçadan, məktəbdən, universitetdən dəyişməlidir.
Hər kəs bilməlidir ki, dövlət məmuru xalqa və dövlətə xidmət etməlidir. Cənab Prezident dəfələrlə qeyd edib ki, çirkin əməllərdən əl çəkmək lazımdır və məmurlar vətəndaşlarla yaxın olmalı, bütün fəaliyyətləri onlara xidmət etməkdir. Əhalinin malına, puluna, kartına göz dikməkdən uzaq durmalıdırlar”.
R.Zeyni vurğulayıb ki, son zamanlar vəzifəyə yeni təyin edilmiş bəzi kadrlar doğrudan da effektiv işlər görürlər:
“Amma bəzi kadrlar da var ki, onlar üçün qaydalar dəyişməyib. Fikrimcə, bir az zaman lazımdır ki, köhnə düşüncələrdən azad olaq. Cəmiyyətdə yeni düşüncə hakim olmalıdır.
44 günlük şərəfli müharibədən sonra əldə etdiyimiz qələbəyə layiq olmalıyıq. Belə qələbə əldə edən millətin nümayəndələrinə yaraşmaz ki, korrupsiya və rüşvətxorluq üstündə həbs olunsunlar.
Ona görə də bütün gücümüzü səfərbər etməliyik. Dövlət, hökumət, vətəndaş cəmiyyəti QHT-lər müasir və təmiz kadrların vəzifəyə gəlməsi üçün çalışmalıdır.
Ölkə başçısı tərəfindən qarşımıza qoyulan məqsəd və vəzifələr ləyaqətlə yerinə yetirilməlidir”.
