Paşinyanın fikirləri aldadıcı xarakter daşıyır
"Ermənistan Baş naziri Nikol Paşinyan dəfələrlə sülh müqaviləsinin imzalanması ilə bağlı bəyanatlar səsləndirib və ertəsi gün tam fərqli mövqe nümayiş etdirib".
Bu barədə millət vəkili Nəsib Məhəməliyev deyib. Deputat vurğulayıb ki, əfsuslar ki, Paşinyan qeyri-stabil, səsləndirdiyi fikirlərin məsuliyyətini dərk etməyən siyasətçi kimi tanınır:
"Bəyanat vermək yox, konkret sülh müqaviləsini imzalamaq lazımdır. Ancaq Ermənistanın son zamanlardakı davranışları onu göstərdi ki, bu ölkə barışığa deyil, daha çox konfrantasiyaya köklənir. Paşinyanın sülhlə bağlı fikirləri aldadıcı xarakter daşıyır. Məqsəd Azərbaycanı "aqressiv", "müharibə tərəfdarı", Ermənistanı isə "sülhpərvər" obrazında təqdim etməkdir. Sülh istəyən dövlət, sərhədə qoşunları yığmazdı, yenidən silahlanmazdı, şərti sərhədlərdə təxribata əl atmazdı. Həmçinin əsassız olaraq Azərbaycanı "soyqırıma, etnik təmizləməyə və humanitar böhrana" görə suçlamazdı. O baxımdan çox təəssüf ki, ilin sonuna qədər sülh müqaviləsinin imzalanacağı iddiası inandırıcı deyil".
Qeyd edək ki, Ermənistan Baş naziri Nikol Paşinyan bir neçə dəfə deyib ki, ilin sonuna qədər Ermənistanla Azərbaycan arasında sülh sazişi imzalana bilər. Baş nazirin sözlərinə görə, İrəvan bunun üçün bütün lazımi addımları atır: "Çünki belə bir sazişi imzalamaq üçün siyasi öhdəlik götürmüşəm. Bəli, ilin sonunadək imzalanmasını mümkün sayıram”.
