ABŞ və İsrailin hücumları ilə başlayan İran müharibəsi 24-cü gününə qədəm qoyub.
ABŞ Prezidenti Donald Tramp bildirib ki, “İranın enerji stansiyalarına yönəlmiş bütün hərbi hücumların 5 gün müddətinə təxirə salınması barədə göstəriş vermişəm”.
Sherg.az müharibə ilə bağlı son inkişaflarları təqdim edir...
ABŞ Prezidenti Donald Tramp müharibə ilə bağlı açıqlamalar verib. O bildirib ki, son iki gündə ABŞ və İran arasında danışıqlar aparılıb və bu görüşlər “çox yaxşı və səmərəli” keçib. Tramp qeyd edib ki, danışıqlarda “Yaxın Şərqdəki münaqişələrin tam və qəti həlli” müzakirə olunub.
Tramp deyib: “Müharibə Nazirliyinə göstəriş verdim ki, davam edən görüşlərin uğurlu nəticəsindən asılı olaraq, İranın enerji stansiyaları və enerji infrastrukturuna qarşı bütün hərbi hücumlar 5 gün müddətinə təxirə salınsın”.
Trampın açıqlamaları bazarlarda dərhal müsbət qarşılanıb, Brent neftinin qiyməti 108 dollardan 98 dollara düşüb.
Böyük Britaniya: İran bizi hədəf almır
Böyük Britaniyanın Baş naziri Keir Starmer bildirib ki, İranın Böyük Britaniya ərazisini hədəf aldığına dair heç bir qiymətləndirmə yoxdur. O deyib: “Təhlükəsizliyimizi daim qiymətləndiririk və bu cür hədəf alındığımıza dair hər hansı nəticə yoxdur”.
Həftəsonu İranın Hind okeanındakı ABŞ–Böyük Britaniya ortaq hərbi bazası Diego Qarsiyaya iki ballistik raket atdığı barədə xəbərlərdən sonra bu iddialar ortaya çıxmışdı.
İrandan Hörmüz böhranına cavab
İran Müdafiə Şurası Hörmüz boğazı ilə bağlı açıqlama verib. Bildirilib ki, “müharibədə iştirak etməyən dövlətlərin Hörmüzdən keçməsinin yeganə yolu İranla koordinasiyadır”.
Açıqlamada qeyd olunub ki, İran sahillərinə və ya adalarına hücum Körfəzdə nəqliyyat və rabitə xətlərinin kəsilməsinə səbəb ola bilər və İran, sahil xətti də daxil olmaqla, dənizə partlayıcı minalar yerləşdirə bilər.
Şura əlavə edib ki, İran “qarşılıqlı cavab zərbələri” endirməkdə qərarlıdır və enerji infrastrukturuna hücuma “təcili və dağıdıcı cavab” verməyə hazırdır.
İran Xarici İşlər Nazirliyi isə Diego Qarsiya bazasına raket hücumu ilə bağlı iddiaları rədd edərək bunu “İsrailin saxta bayraq əməliyyatı” adlandırıb.
Trampdan İrana xəbərdarlıq
Donald Tramp daha əvvəl bildirib ki, əgər Tehran 48 saat ərzində Hörmüz boğazını bütün gəmi trafiki üçün tam açmasa, İranın enerji obyektləri hədəf alınacaq.
İran İnqilab Keşikçiləri Korpusu (SEPAH) bu təhdidə cavab olaraq bəyan edib ki, İranın elektrik stansiyalarına hücum olarsa, regionda İsrail və ABŞ bazalarını elektriklə təmin edən obyektlərə zərbə endiriləcək. Açıqlamada “siz elektrikə zərbə vursanız, biz də elektrikə zərbə vuracağıq” mesajı verilib və hər bir təhdidə eyni səviyyədə cavab veriləcəyi bildirilib.
İran dövlət mediasında yayılan açıqlamada isə deyilib: “Yalançı ABŞ prezidenti İnqilab Keşikçilərinin su təmizləmə obyektlərinə hücum etməyi və region ölkələrinin xalqlarına çətinlik yaratmağı planlaşdırdığını iddia edib”.
Təl-Əviv hədəf alındı
Gecə boyu siqnalların səsləndiyi Təl- Əviv şəhəri İranın cavab zərbələrinin hədəfi olub. Martın 22-də hava hücumundan müdafiə sistemi tərəfindən zərərsizləşdirilən, lakin partlamayan İran raketi məktəb həyətinə düşüb. Bildirilir ki, bu raket İranın “Fəttah” raketi ola bilər. Hadisə nəticəsində ölən və ya yaralanan olmayıb.
İsrail rəsmilərinin düşən raketlərlə bağlı araşdırmaya başladığı, həmçinin Dimona və Arad şəhərlərinin vurulmasından sonra hava müdafiə sistemlərinin fəaliyyətinin yoxlanıldığı qeyd olunur.
Raket hücumları davam edir
İsrail ordusu müharibənin 24-cü günündə Tehrandakı infrastruktur obyektlərinə genişmiqyaslı hücum həyata keçirdiyini açıqlayıb. İran mətbuatı isə hücumların ölkənin şimal-qərbində yerləşən Urmiya şəhərində binaları vurduğunu bildirib.
Daha sonra İsrail ordusu İranın cavab hücumuna başladığını, raketləri zərərsizləşdirmək üçün çalışdıqlarını və əhalini sığınacaqlara getməyə çağırdıqlarını açıqlayıb.
İranın cavab olaraq atdığı bəzi raketlərin Yerusəlim səmasında göründüyü bildirilib.
Səudiyyə Ərəbistanının Müdafiə Nazirliyi isə Riyad istiqamətində atılan iki ballistik raketdən birinin zərərsizləşdirildiyini, digərinin isə yaşayış olmayan əraziyə düşdüyünü açıqlayıb.
