Paşinyan KTMT-nin missiyasının bölgəyə yerləşdirmə təklifinə razı olmayacaq
Ermənistanda Kollektiv Təhlükəsizlik Müqaviləsi Təşkilatının missiyasının yerləşdirilməsi sərhəddəki vəziyyətin sabitləşməsinə töhfə verə bilər. Bunu Rusiya Xarici İşlər Nazirliyinin rəsmi nümayəndəsi Mariya Zaxarova bildirib. O, Qarabağın Kollektiv Təhlükəsizlik Müqaviləsi Təşkilatının məsuliyyət zonasına daxil olmadığını xatırladıb: "Top Ermənistanın tərəfindədir". Xatırladaq ki, bir müddət öncə təşkilatın nümayəndəsi Yuri Şuvalov da demişdi ki, Kollektiv Təhlükəsizlik Müqaviləsi Təşkilatı Ermənistan-Azərbaycan şərti sərhədinə missiya göndərməyə hazırdır. O bildirmişdi ki, KTMT Ermənistanın təhlükəsizliyi naminə bu addımı ata bilər. Qeyd edək ki, daha əvvəl Ermənistan Baş naziri Nikol Paşinyan KTMT-ni tənqid etmiş, bu qurumun ölkəsindən çıxdığını söyləmişdi. Onu da diqqətə çatdıraq ki, Azərbaycan-Ermənistan sərhədi demarkasiya və delimitasiya olunmayıb. Hazırkı sərhəd şərti xarakter daşıyır.
Siyasi elmlər doktoru, professor Cümşüd Nuriyev "Sherg.az"a deyib ki, Qarabağda sülhməramlı kontingent yerləşdirmiş Rusiyanın, üstəlik, Azərbaycan-Ermənistan sərhədinə də qoşun göndərmək niyyəti normal deyil. Professorun sözlərinə görə, Ermənistan müstəqil siyasət yeritmədiyi üçün əslində İrəvana heç bir "top" verilməyib: "Ermənistan Rusiya nə deyirsə, onu icra edir. Lakin Qərbin dəstəyi ilə hakimiyyətə gəlmiş Baş nazir Nikol Paşinyanın Kollektiv Təhlükəsizlik Müqaviləsi Təşkilatı missiyasının bölgəyə yerləşdirmə təklifinə razı olmayacağı ümid edilir. Onu da qeyd edim ki, KTMT-nin nizamnaməsində sərhədlərin birgə qorunması barədə hansısa bənd yoxdur. Azərbaycan-Ermənistan arasında ümumiyyətlə təsdiqlənmiş sərhəd yoxdur. Delimitasiya və demarkasiya prosesi aparılmadığı halda KTMT qeyri-müəyyən sərhəddə nə edəcək?! Moskva regionla bağlı növbəti hazırlıq içindədir. Çünki Türkiyə lideri Rəcəb Tayyib Ərdoğan NATO Sammitindən sonra çıxışında 2025-ci ilə qədər rus sülhməramlılarının bölgəni tərk edəcəyini söyləmişdi.
Rusiya isə çalışır ki, Qarabağdan çıxacağı təqdirdə ən azından Ermənistan-Azərbaycan sərhədində "otursunlar". Əslində bu məsələ Ermənistanın "daxili işi" kimi təqdim olunsa da, sərhəd bölgə olduğuna görə Azərbaycanın da maraqlarına ziddir. KTMT-nin regiona, Azərbaycan-Ermənistan sərhədinə gəlməsi mümkünsüzdür. Bununla rəsmi Bakıya təzyiq göstərmək istəyirlər. Ümumən, son zamanlar Azərbaycana təzyiqlər artmaqdadır. Lakin yaxşı olar ki, Rusiya öz aqibətini, Ukrayna ilə müharibədə düşdüyü durumu götür-qoy etsin".
