Prezident İlham Əliyev Şuşa Qlobal Media Forumunda çıxışı zamanı Ermənistandakı revanşist qüvvələrdən də danışıb. Dövlət başçısı bildirib ki, bizə keçmişdə olan təhlükə 30 il ərzində Ermənistan və onun işğalçılıq siyasətindən qaynaqlanırdı. Artıq biz ümumilikdə bu təhlükənin öhdəsindən gəlmişik: "Ancaq, əlbəttə, biz ayıq olmalıyıq, keçmişimizi unutmamalıyıq". Ölkə rəhbəri vurğulayıb ki, İkinci Qarabağ müharibəsinin nəticələrinə baxmayaraq, bu gün Ermənistanın, cəmiyyətin və hətta hökumətin tərkibində müəyyən insanlar var ki, hələ də revanşist ideyalarla yaşayırlar.
Politoloq İlqar Vəlizadə "Sherg.az"a açıqlamasında deyib ki, Ermənistandakı revanşist qüvvələr daim təxribat törədirlər.
Analitik vurğulayıb ki, Ermənistanla şərti sərhədlərdəki gərginlik də bundan xəbər verir ki, İrəvan hakimiyyətində, orduda revanşist güclər kifayət qədərdir:
"Şübhə yox ki, məhz Ermənistandakı revanşist dairələrin göstərişi və tapşırığı ilə müxtəlif istiqamətlərdə təxribatlar baş verir. Dövlət başçısı çox doğru vurğulayır ki, biz keçmişi unutmamalıyıq və hər zaman ayıq-sayıq olmalıyıq. Nəzərə almalıyıq ki, biz sadəcə Ermənistan hakimiyyəti ilə deyil, eyni zamanda dünya erməniliyi ilə də mübarizə aparmışıq və bugün də aparırıq. Hələ də sülhə mane olan erməni diasporası və onların arxasında dayanan siyasi qruplarla mübarizəmiz davam edir. Keçmişimizi unutsaq və müharibənin indiki nəticəsi ilə kifayətlənsək, revanşist dairələr yenidən baş qaldıra bilər. Buna imkan vermək olmaz"
