Növbəti etiraz dalğasında İranı daha çətin, məşəqqətli aqibət gözləyir, hadisələr rejimin sonunu gətirəcək
Avropa İttifaqı (Aİ) İrana qarşı yeni sanksiyalar rejiminin yaradılması ilə bağlı qərara gəlib. Bu barədə Aİ xarici işlər nazirlərinin görüşündən sonra təşkilatın xarici siyasət xidmətinin rəhbəri Jozep Borrel məlumat verib. Bildirib ki, xarici işlər nazirləri Rusiya və Suriyaya hərbi tadarükə görə İrana qarşı yeni sanksiyalar mexanizminin yaradılması ilə bağlı razılıq veriblər. ABŞ Maliyyə Nazirliyi də çirkli pulların yuyulmasının və İrana ABŞ dollarının köçürülməsinin qarşısını almaq üçün 14 İraq bankına sanksiya tətbiq edərək, onlara dollar əməliyyatları aparmağı qadağan edib. Sanksiyalar İraq hakimiyyətinin son həftələrdə İrandan aldığı elektrik enerjisi müqabilində ölkənin borclarını ödəməyin yollarını tapmağa çalışdığı bir vaxtda tətbiq olunub.
Siyasi şərhçi Azər Niftiyev "Sherg.az"a açıqlamasında deyib ki, Avropa İttifaqının İrana qarşı sanksiyaları müəyyən və uzunmüddətli perspektivdə nəticələrə hesablanmış bir addımdır. Ekspert bəyan edib ki, artıq İranda sanksiyalara, iqtisadi embarqolara qarşı bir immunitet formalaşıb: "Rusiyanın Ukraynaya hərbi təcavüzü məsələsində də gördük ki, Qərbin ya sanksiyaları effektiv olmur, ya da məqsədyönlü şəkildə uzaq gələcəyə hesablanır. Belə sanksiyalar da avtoritar rejimləri o qədər də qorxutmur. Aİ-nin İrana qarşı növbəti sanksiya paketi cənub qonşumuzun müəyyən mənada zəifləməsinə gətirib çıxarsa da, ciddi şəkildə təsir göstərə bilməyəcək. Bir müddətdir ki, İranda kütləvi etirazlar davam etməkdədir. Baxmayaraq ki, həmin etirazlar bir qədər səngiyib, amma kiçik qığılcım etirazları yenidən alovlandıracaq. Növbəti etiraz dalğasından İranı daha çətin, məşəqqətli aqibət gözləyəcək. Bu da rejimin sonunu gətirəcək. Azərbaycanla münasibətlərdə də daim düşmənçilik, qərəz açıq-aşkar özünü göstərib. Bunun dəfələrlə şahidi olmuşuq. İran İsraili bəhanə edərək Azərbaycana düşmən gözü ilə baxır. Ancaq Tehran rejiminin Azərbaycana real təzyiq alətləri yoxdur. 44 günlük müharibədən sonra Cənubi Qafqazda yaranmış reallıqlar Azərbaycanın geosiyasi məkanda mövqeyini daha da gücləndirib. İran bu reallıqların diktəsi ilə barışmaq məcburiyyətindədir. Ara-sıra müəyyən təzyiqlər göstərməyə çalışsa da, nəticədə geri çəkilməyə məcbur qalır".
