MDB içərisində Azərbaycan Ukraynaya ən çox yardım göstərən ölkədir
Azərbaycan xarici işlər nazirinin müavini Samir Şərifov Ukrayna səfiri Yuri Husyev ilə görüşüb. Bu barədə Ukrayna səfiri “X”də paylaşım edib. Diplomat vurğulayıb ki, Azərbaycanın göndərdiyi humanitar yardımın yeni partiyası - enerji avadanlığı artıq Ukraynaya çatdırılıb: "Bunun üçün minnətdarıq. Strateji tərəfdaşlığımızı daha da gücləndirmək üçün birgə addımlar barədə razılığa gəldik". Rusiya ilə yaşanan gərginlik fonunda Azərbaycanın Ukraynaya dəstəyi diqqət çəkir. Bakı indiyədək Ukraynaya müxtəlif istiqamətlərdə humanitar yardımlar göndərib, xüsusilə də enerji infrastrukturu üçün vacib olan avadanlıqların təchizatı ilə önə çıxır. Bu addımlar Azərbaycanın həm humanitar öhdəliklərinə sadiqliyini, həm də Ukrayna ilə strateji tərəfdaşlığını gücləndirmək niyyətini nümayiş etdirir. Rusiya rəsmiləri isə Azərbaycanın Ukraynaya yardımlarının heç bir məna kəsb etmədiyini vurğulayıblar.
"Alyans" Strateji Əməkdaşlıq Mərkəzinin rəhbəri Abutalıb Səmədov Sherg.az-a deyib ki, müharibə başlayandan etibarən Azərbaycan Ukraynaya fasiləsiz olaraq humanitar yardımlar göstərib. Ekspertin sözlərinə görə, sonuncu yardım 2 milyon dollar həcmində olub:
"Bu addım Rusiya ilə münasibətlərimizin kifayət qədər gərgin olduğu dönəmə təsadüf edib. Əslində, bundan əvvəl Azərbaycan Ukraynaya daha böyük məbləğlərdə yardımlar göstərib. O baxımdan 2 milyon dollarlıq yardım kiməsə "mənasız" görünə bilər. Ancaq işıq üzünə həsrət qalan Ukrayna xalqı üçün energetika avadanlıqlarının çox böyük əhəmiyyəti var. Təbii ki, Moskva ilə münasibətlərin səviyyəsindən asılı olmayaraq, Azərbaycan Ukraynaya humanitar yardımlarını davam etdirəcək. Azərbaycanla Rusiya arasında vəziyyətin pisləşməsi birbaşa Kremlin Azərbaycana mənfi münasibətindən, əlaqələri qəsdən korlamasından asılıdır. Rusiya Azərbaycana məxsus mülki təyyarənin öz hava məkanında məqsədyönlü şəkildə vurulmasından sonra sivil dövlət kimi davranmayıb. Üzr istəmək, təzminat ödəmək, günahkarları cəzalandırmaq kimi addımlar atmayıb. Bu da Moskva-Bakı münasibətlərində soyuqluğa səbəb olub. Yenə də ümid edirik ki, Rusiya tutduğu mövqenin yanlış olduğunu anlayacaq və Azərbaycanla münasibətlərin normallaşması üçün zəruri addımları atacaq".
Həmsöhbətimizin fikrincə, Rusiya ilə yaşadığımız gərginlik Ukraynaya yardımların həcmində hansısa dəyişikliyə, artıma, yaxud azalmaya gətirib çıxarmayacaq:
"Bakı öz imkanları daxilində Kiyevə hər zaman yardım əlini uzadacaq. Müstəqil Dövlətlər Birliyi içərisində Azərbaycan Ukraynaya ən çox yardım göstərən ölkədir. Biz öz yardımlarımızı hansısa üçüncü tərəfi qıcıqlandırmaq qayəsi ilə yox, birmənalı şəkildə humanitar məqsədlə edirik".
