"Zərər çəkmiş kimi istintaqın gedişi ilə bağlı materiallarla tanışam. Azərbaycanın hüquq mühafizə orqanları çox peşəkarcasına çalışır"
Deputat Fazil Mustafaya qarşı törədilmiş sui-qəsdlə bağlı saxlanılan şəxslər barəsində seçilmiş həbs qətimkan tədbirinin uzadılması ilə bağlı DTX İstintaq Baş İdarəsinin müstəntiqi tərəfindən verilən vəsatətlərə baxılıb.
Bu gün Səbail rayon Məhkəməsində hakim Mədinə Bağırovanın sədrliyi ilə keçirilən prosesdə saxlanılanlar barəsində həbs qətimkan tədbirinin müddəti daha 4 ay uzadılıb.
Məhkəmə prosesinin başlamadığını deyən millət vəkili Fazil Mustafa "Sherg.az"a bildirib ki, istintaq davam edir:
"Zərər çəkmiş kimi istintaqın gedişi ilə bağlı materiallar ilə tanışam. Burda da Azərbaycanın hüquq mühafizə orqanları çox peşəkarcasına çalışır. Həm DTX-nın müstəntiqləri, həm də DİN-in işçiləri yüksək səviyyədə fəaliyyət göstərir. Qonşu dövlətdə hazırlanan cinayət işinin bütün detalları demək olar üzə çıxarılıb. Yəqin orda müəyyən araşdırılmalı məsələlər davam edir. Ona görə də istintaq müddəti uzadılıb. Bu proses məhkəməyə çıxarılandan sonra, artıq hadisənin bütün mahiyyəti aydınlaşacaq. Çünki bu ciddi bir terrakt idi və arxasında duran qüvvələrin aşkar olunmasına nail olundu. Ümid edirəm ki, bir daha Azərbaycanın gücü qarşısında dövlətimizə qarşı təhdid təşkil edən və xarici güclərin hesabına qidalanan qüvvələr bundan nəticə çıxaracaq".
Qeyd edək ki, martın 28-də saat 21:51-də Azərbaycan Respublikası Milli Məclisinin deputatı Mustafa Fazil Qəzənfər oğluna yaşadığı evin qarşısında – Bakı şəhəri, Sabunçu rayonu, Zabrat-1 qəsəbəsi, Babək küçəsi ev 2 “Z” ünvanında “Kalaşnikov” konstruksiyalı avtomat silahından atəş açılaraq terror aktı törədilib.
Terror aktı nəticəsində Fazil Mustafa bədənin sağ çiyin qurşağını və sağ budun aşağı üçdə birini dəlib keçən güllə yarası alıb.
Faktla bağlı Azərbaycan Respublikası Dövlət Təhlükəsizliyi Xidmətinin İstintaq baş idarəsində Cinayət Məcəlləsinin 277 (dövlət xadiminin və ya ictimai xadimin xidməti və ya siyasi fəaliyyətinə son qoymaq və ya bu fəaliyyətə görə qisas almaq məqsədilə onun həyatına sui-qəsd etmə) və 228.2.1-ci (qabaqcadan əlbir olan bir qrup şəxs tərəfindən qanunsuz olaraq odlu silah, onun komplekt hissələrini, döyüş sursatı əldə etmə, saxlama, daşıma və gəzdirmə) maddələri ilə cinayət işi başlanılıb.
