Respublikaçı Donald Tramp ABŞ-ın ən böyük düşməninin artıq İran deyil, Demokratlar Partiyası olduğunu bildirib. Onun sözlərinə görə, demokratlar son dərəcə qeyri-kompetentdir.
Sherg.az xəbər verir ki, "RİA Novosti"nin yaydığı məlumata görə, Tramp belə deyib:
“İndi İranın məhvindən sonra Amerikanın ən böyük düşməni radikal solçu, son dərəcə qeyri-kompetent Demokratlar Partiyasıdır. Diqqətiniz üçün təşəkkür edirəm.”
Bundan əvvəl ABŞ Nümayəndələr Palatasında demokrat azlığın lideri Hakeem Jeffries Donald Trampı və “respublikaçı ekstremistləri” Yaxın Şərqdə “düşünülməmiş müharibə başlatmaqda” ittiham edib.
Ceffris bildirib ki, ABŞ-də “rejim dəyişikliyinə ehtiyac var” və əlavə edib ki, Trampın hərəkətləri nəticəsində ölkə daha az təhlükəsiz olub.
ABŞ Demokratlar Partiyası Konqresin yuxarı palatasının işini çətinləşdirməyə hazırlaşır. Demokratlar prezidentin hərbi səlahiyyətləri ilə bağlı qətnamələr üzrə məcburi və təkrar səsvermələr taktikasından istifadə etməyi planlaşdırırlar.
Kaliforniyadan demokrat senator Adam Schiff bu addımı İranla bağlı hərbi əməliyyata görə məsuliyyətin müəyyənləşdirilməsi ilə izah edib:
“Tarixdə özünü ən şəffaf adlandıran administrasiya bu müharibəyə görə məsuliyyətdən yayınır.”
Bundan əlavə, demokratlar Respublikaçıların federal seçkilərdə səsvermə qaydalarını sərtləşdirən "SAVE America Act" qanun layihəsini qəbul etməsinin qarşısını almağa çalışırlar.
Qanun layihəsi Donald Tramp və Respublikaçılar Partiyasının təşəbbüsüdür. Layihəyə əsasən, ABŞ vətəndaşları seçkilərdə səs vermək üçün etibarlı fotoşəkilli şəxsiyyət vəsiqəsi təqdim etməlidirlər.
Respublikaçılar bu qanunu 2026-cı ilin noyabrında keçiriləcək aralıq seçkilərdən əvvəl qəbul etməyi planlaşdırırlar.
