Ankaranın xüsusi aktivliyi dünya siyasətində ən fəal siyasi oyunçulardan birinə çevrildiyini göstərir
Türkiyə Prezidenti Rəcəb Tayyib Ərdoğan G20 liderlərinin Hindistanda sentyabrın 8-dən 10-dək keçirilən 8-ci zirvə toplantısında iştirak edib. Liderlər sammit çərçivəsində “Bir dünya, bir ailə, bir gələcək” mövzusu altında, üç sessiyada fikir mübadiləsi aparıblar. Ərdoğan həmçinin G20 liderləri və sammitdə iştirak edən bəzi hökumət başçıları ilə təkbətək görüşlər keçirib, önəmli məsələlərin müzakirəsi baş tutub. Türkiyə rəhbəri ABŞ Prezidenti Co Baydenlə də ayaqüstü görüşüb və “F-16” qırıcı təyyarələrinin Türkiyəyə tədarükü məsələsindən danışıb. Ərdoğan Yaponiyanın Baş naziri Fumio Kişida ilə görüşüb. İki lider qlobal və regional məsələləri müzakirə ediblər. Ərdoğan Qərb liderləri ilə təmaslarda İsveçin NATO-ya üzvlüyündən də bəhs edib. Deyib ki, Türkiyə Böyük Millət Məclisində belə bir qərar qəbul olunmayınca “hə” deməyi mümkün deyil. Türkiyənin Avropa İttifaqında (Aİ) üzvlük məsələsinə toxunan Ərdoğan bu barədə “Avropa İttifaqına üzv ölkələr 50 ildir bizi başdan eləyirlər. Bizi dayandırsalar da, üzv etməsələr də, Türkiyə Türkiyədir, biz yolumuza davam edəcəyik” söyləyib. Türkiyə lideri Avropa İttifaqı Şurasının rəhbəri Şarl Mişellə Azərbaycan-Ermənistan münasibətlərini də müzakirə edib. Ərdoğan Qarabağda qondarma "seçkilərlə" bağlı Paşinyana xəbərdarlıq edəcəyini, Ankaranın bunu neqativ qəbul etdiyini bildirib.
AĞ Partiyanın sədr müavini, siyasi şərhçi Əhəd Məmmədli "Sherg.az"a bildirib ki, Rusiya XİN başçısı Sergey Lavrov G20 sammitini "qlobal cənubun", BRİKS ölkələrinin qalibiyyəti adlandırıb. Analitikin sözlərinə görə, tədbirin yekun qətnaməsi də Ukrayna rəhbərliyini narazı salıb:
"Fransa Prezidenti E.Makron Rusiya rəsmisinə cavabında deyib ki, sammiti "Putinin qalibiyyəti" kimi dəyərləndirmək lazım deyil və s. Yəni müəyyən söz atışmaları, narazılıqlar baş verib. Amma G20 sammiti Türkiyənin iştirakı baxımından önəmlidir. Prezident Rəcəb Tayyib Ərdoğan dünya lideridir və sammitdə də o cür qarşılanır. Son illərdə Türkiyənin xarici siyasətdə mühüm yol qət etməsi və Ərdoğanın dünya miqyasında liderə çevrilməsi də öz sözünü deyir. Türkiyə liderinin G20 sammiti çərçivəsində keçirdiyi görüşlər, Baydenlə, Şarl Mişellə danışıqlar, Azərbaycan-Ermənistan münasibətlərinin müzakirəsi, İrəvana verilən mesajlar və s. Ankaranın xüsusi aktivliyini göstərir. Həm də qardaş ölkənin sadəcə regionda deyil, dünya siyasətində ən fəal siyasi oyunçulardan birinə çevrildiyini göstərir. Türkiyə bütün cəbhələrdə aktiv şəkildə siyasi fəaliyyətini davam etdirir, sözünü deməkdən çəkinmir. Təbii ki, bu da Azərbaycanın maraqlarına tam cavab verir".
