Dərman, dərman preparatları ilə bağlı dövlət böyük işlər görür.
Bunu Milli Məclisin İqtisadi siyasət, sənaye və sahibkarlıq komitəsinin bu gün keçirilən iclasında deputat Rüfət Quliyev deyib.
Bununla belə, deputat bu sahədəki problemlərə də toxunub: “Bir qutusu 73 manata olan “Sincardi” dərmanı artıq ölkəyə gəlmir. Onun əvəzinə ölkəyə gətirdikləri dərman isə 230 manatdır. Yəni vətəndaş 73 manat əvəzinə 230 manat verib, özünə dərman almalıdır?! Bunun qarşısını almaq lazımdır. Mən bir dəfə burada başqa dərmanla bağlı çıxış etmişdim, o məsələ həll olunmuşdu. Biz yenə də bu məsələlərdə insanlara kömək etməliyik. Burada şirkətlər oyunlar oynayır”.
Komitə sədri Tahir Mirkişili qeyd edib ki, bu hadisələrin baş verməməsi üçün işlər görülür.
Deputat Elnur Allahverdiyev qeyd edib ki, dərman, dərman preparatlarının keyfiyyəti araşdırılmalıdır: “Hərarət azaldıcı dərmanların keyfiyyəti araşdırılmalıdır. Qardaş Türkiyədə istifadə olunan eyni səviyyədə dərmanlar bizdə də satılır. Oradakı dərman virusa qarşı daha effektivdir. Türkiyədən alınan dərman hərarəti azaldır, amma buradan aldığımız yox. Yaxşı olar ki, Səhiyyə komitəsi ilə birgə dərmanların keyfiyyəti ilə bağlı dinləmə keçirək”.
Qeyd edək ki, “Sincardi” diabet xəstələri üçün nəzərdə tutulub. İnsulindən asılı olmayan diabet (Tir 2) xəstələrində qlikemik indeksə nəzarəti yaxşılaşdırmaq üçün nəzərdə tutulub, təsir mexanizmi bir-birini tamamlayan iki hiroqlikemik dərman vasitəsini özündə birləşdirir.
Məsələni dəyərləndirən professor Adil Qeybulla “Sherg.az”a açıqlamasında deyib ki, Azərbaycan dərman vasitələrinin daxili istehsalına keçməlidir:
"Məsələn, Almaniyada qalen peraparatları dediyimiz tenktura, dəmləmələr şəklində Şərq reseptləri ilə hazırlanan dərman, bitki tərkibli maddələr istehsal olunur. Müasir, tablet və inyektiv formalı dərman pereparatlarının hazırlanmasına da başlanmalıdır. Əslində, dərmanların daxili istehsalı geniş istifadə olunan dərmanları əhatə etməlidir. Dərman maddələrinin bazardakı qiymətinin tənzimlənməsi üçün qardaş Türkiyə ilə əlaqələr qurulmalıdır. Türkiyə dərmanlarının keyfiyyəti kifayət qədər yüksəkdir. Hansısa dərmanın defistisi yarandıqda ən azından onun Türkiyədəki analoqundan istifadə etsək, daha məqsədəuyğun olar. Bu zaman qiymətlərdə disbalans və çətin stiuasiya yaranmaz".
A.Qeybulla qeyd edib ki, ölkədə Avropa və Türkiyə ilə müştərək firmalar qurulmalıdır:
"Hazır məhsul gətirilərək ölkəmizdə dərman maddələrinin qablaşdırılmasını təşkil etmək olar. Daha sonra daxili istehsala keçmək mümkündür. Düşünürəm ki, dərman bazarında yaranan xaotik durumdan qurtula bilmək üçün bu prossesə başlanılmalıdır".
