Rusiyada ayıların yaşayış məntəqələrinə yaxınlaşması və insanlara hücum etməsi halları artmaqdadır. Sherg.az xəbər verir ki, Milli Antikorrupsiya Komitəsinin rəhbəri, Rusiya Prezidenti yanında İnsan Hüquqları Şurasının üzvü Kirill Kabanov problemin əsas səbəblərindən birinin ovçuluq qaydaları və iqtisadi amillərlə bağlı olduğunu bildirib.
Kabanovun sözlərinə görə, əvvəllər ayı ovlamaq daha geniş yayılmışdı. Lakin ov lisenziyalarının baha olması və onların sayının məhdudlaşdırılması səbəbindən ayıların ovlanması azalıb. Bu isə onların sayının artmasına şərait yaradıb.
O bildirib ki, ov təsərrüfatlarına ayrılan lisenziyaların sayı bəzən ərazidəki ayıların real sayına uyğun gəlmir. Buna görə də təhlükəli heyvanların sayını tənzimləmək çətinləşir.
Ekspertin fikrincə, ayıların insanlara yaxınlaşmasının digər səbəbi asan qida əldə etmələridir. Yaşayış məntəqələrinin ətrafındakı zibilliklər, qida qalıqları və əkin sahələri heyvanları cəlb edir. Nəticədə ayıların bir neçə nəsli insanlardan qorxmamağa alışıb.
Kabanov qeyd edib ki, payızda ayılar qış yuxusuna getməzdən əvvəl daha çox qida toplamağa çalışdıqları üçün yaşayış məntəqələrinə yaxınlaşmaları arta bilər.
O, problemin həlli üçün ov lisenziyalarının sayının ərazidəki heyvanların real sayına uyğun müəyyənləşdirilməsini, mövsümi lisenziyaların tətbiqini və insan həyatı üçün təhlükə yaradan ayıların ovlanmasının asanlaşdırılmasını təklif edib.
Məqalədə həmçinin vurğulanır ki, meşələrin azalması və qida çatışmazlığı ayıların insanlara yaxınlaşmasını izah edən yeganə amillər deyil. Bəzi mütəxəssislər bunu ayıların sayının artması, yaşayış arealının genişlənməsi və heyvanların ərazilər uğrunda mübarizəsi ilə əlaqələndirirlər.
