Türkiyə pilotsuz uçuş aparatı (SIHA) olan "Bayraktar TB3"ün ilk partiyasını İndoneziyaya ixrac edəcək.
Teleqraf xəbər verir ki, bnunla bağlı Prezident Rəcəb Tayyib Ərdoğanın İndoneziyaya səfəri çərçivəsində “Bayraktar TB3 və Bayraktar AKINCI ixracına dair ortaq istehsal müqaviləsi” sənədi imzalanıb. Həmçinin Ərdoğanın bu ölkəyə səfəri zamanı iki dövlət 13 sənədə imza atıblar.
Əldə edilən məlumata görə, müqavilə çərçivəsində 60 ədəd "Bayraktar TB3" və 9 ədəd "Bayraktar AKINCI" İndoneziyaya göndəriləcək.
Qeyd edək ki, "Bayraktar TB3" sinfindəki pilotsuz uçuş aparatları ilə müqayisədə öz imkanlarında əhəmiyyətli yeniliklər təqdim edir. Görmə xəttindən kənar əlaqə qabiliyyətinə malik olan uçuş aparatı çox uzaq məsafələrdən idarə oluna bilər. Belə ki, daşıdığı ağıllı döyüş sursatları ilə xaricdəki hədəflərə qarşı kəşfiyyat-müşahidə, kəşfiyyat və hücum missiyaları yerinə yetirir.
Yüksək hündürlük, uzun dözümlülük və geniş yük seçimləri ilə döyüş meydanında əhəmiyyətli bir çəkindirici gücə malik olan "Bayraktar AKINCI" yanğın, zəlzələ və axtarış-xilasetmə əməliyyatları kimi vəziyyətlərdə də humanitar yardım məqsədlərində istifadə oluna bilir.
