Azərbaycan xüsusi xidmət orqanlarının gələcək əməliyyatlar üçün sensasion eksklüziv imkanlara çıxışı güclənir
Terror qruplaşmasının fəaliyyətində iştirak edən Azərbaycan vətəndaşları saxlanılaraq ölkəyə gətirilib. Dövlət Təhlükəsizlik Xidmətinin məlumatında qeyd olunub ki, beynəlxalq terror təşkilatları ilə əlaqəsi olan Azərbaycan Respublikasının vətəndaşlarından ibarət cinayətkar dəstələr formalaşdırma, ölkənin şimal bölgəsində meşə massivində yeraltı sığınacaqlar yaradılması ilə müşayiət olunan terror aktlarına hazırlıq, bu məqsədlə silah-sursat, partlayıcı maddələr, texniki qurğular və digər zəruri ləvazimatlarla təchiz etmə əməlləri ilə bağlı Dövlət Təhlükəsizliyi Xidmətində (DTX) başlanılmış cinayət işləri üzrə kompleks əməliyyat-istintaq tədbirləri davam etdirilir. Aparılan araşdırmalarla terrorçuluq cinayətlərinin törədilməsi məqsədilə yaradılmış dəstənin üzvləri - Vüqar Nəcəfli, Camal Gözəlov, Tofiq Yusifli və Dadaş Həşimovun 2024-cü ildə Azərbaycanı tərk edərək Pakistanın Əfqanıstanla sərhədində yerləşən dağlıq ərazilərdə gizləndikləri təsbit edilib. Onların beynəlxalq terror təşkilatının tərkibində Azərbaycanın hüdudlarından kənarda döyüş təlimlərində və silahlı münaqişələrdə iştirak etmələri, cinayətkar məqsədlərlə silahlı təlimlər keçmələri müəyyənləşdirilib. DTX tərəfindən həyata keçirilmiş əməliyyat-axtarış tədbirləri nəticəsində barələrində istintaq aparılan adları qeyd olunan şəxslərin xarici ölkələrin ərazisində ələ keçirilərək Azərbaycana gətirilmələri təmin edilib.
Siyasi şərhçi Aqşin Kərimov Sherg.az-a deyib ki, Azərbaycan Respublikasına qarşı separatçılıqda və terror fəaliyyətlərində iştirak etməkdə şübhəli bilinən şəxslərin keçirilən əməliyyatlarla həbsi rəsmi Bakının təhdidlərdən müdafiə qabiliyyətindəki performansını ortaya qoyur. Ekspert qeyd edib ki, bu kritik proses kəşfiyyat məlumatları əsasında qərarlar qəbul etməyə, onların təhlilinə əsaslanır:
"Kəşfiyyat əməliyyatları ölkəni daxili və beynəlxalq təhdidlərdən qorumaq üçün lazım olan məlumatları təmin edən strateji müdafiənin mühüm tərkib hissəsidir. Bu, təhlükəsizlik və kəşfiyyat şəraitini düzgün qiymətləndirməyə əsaslanır. Uyğun olaraq tərəfdaş dövlətlərlə informasiya mübadilələrinə, əməkdaşlıq modelinin genişlənməsinə dəlalət edir. Həmçinin, Azərbaycanın xüsusi xidmət orqanlarının düzgün planlaşdırma, strategiya və əməliyyat planlamasının effektiv şəkildə həyata keçirilməsi ilə nəticələnir. Azərbaycan xüsusi xidmət orqanlarının gələcək əməliyyatlar üçün sensasion eksklüziv imkanlara çıxışı güclənir. Qısası, günlərin birində ən toxunulmaz hesab edilən şəxslərin belə mühakiməsi baş tutsa, buna təəccüblənmək lazım olmayacaq. Bunlar, xüsusilə Ermənistan ictimaiyyətində Azərbaycana qarşı revanş götürmək istəyən qüvvələri simalaşdıran siyasətçilər arasında qorxunu, həyəcanı dərinləşdirir".
