Türkiyə və Azərbaycan arasındakı hərbi və təhlükəsizlik əməkdaşlığı strateji müttəfiqlik səviyyəsindədir və regionun sabitliyi üçün mühüm əhəmiyyət kəsb edir. Tarixi, mədəni və siyasi bağlarla birləşən iki ölkə müdafiə sahəsində sıx əməkdaşlıq edir. Bu əməkdaşlıq 2021-ci ildə imzalanmış Şuşa Bəyannaməsi ilə yeni mərhələyə keçmiş, qarşılıqlı hərbi yardım və təhlükəsizlik sahəsində birgə fəaliyyət mexanizmləri daha da gücləndirilmişdir. İki ölkənin silahlı qüvvələri mütəmadi olaraq birgə hərbi təlimlər keçirir, bu da döyüş hazırlığını və qarşılıqlı fəaliyyət imkanlarını artırır. Azərbaycan ordusu Türkiyənin hərbi təcrübəsindən, xüsusilə NATO standartlarına uyğun hazırlıq və taktikalardan faydalanır.
Bundan əlavə, Azərbaycan Türkiyədən müasir silah sistemləri, pilotsuz uçuş aparatları (SİHA-lar), zirehli texnika və raket sistemləri alaraq müdafiə qabiliyyətini gücləndirir. Bu əməkdaşlıq təkcə iki ölkənin təhlükəsizliyini deyil, həm də regionda sülh və sabitliyin təmin olunmasını hədəfləyir. Türk dünyasının müdafiə sahəsində inteqrasiyasına töhfə verən bu münasibətlər hər iki ölkənin strateji maraqlarına xidmət edir və gələcəkdə daha da inkişaf edəcəyi gözlənilir.
Türkiyənin Azərbaycandakı keçmiş hərbi attaşesi, ehtiyatda olan general Yücel Karauz “Sherg.az”a bildirib ki, iki ölkənin hərbi əlaqələri Türkiyənin Azərbaycanın müstəqilliyi ilə başlayıb:
“Rəsmi Bakı və Ankara arasında ilk vaxtlar təlimlər və məsləhətləşmələr səviyyəsində hərbi əlaqələr mövcud idi. Daha sonra isə bu əməkdaşlıq hərbi məktəblərin açılması və orada tələbələrin yetişdiriməsi ilə davam etdi. 1992-ci ildən etibarən Türkiyə hərbi məktəblərinə Azərbaycandan kursantların getməsi mütəmadi hal aldı. Həmçinin iki ölkənin hərbi komanda heyəti arasında tez-tez təlimlərin həyata keçirilməsi baş tutdu".
Y.Karauz əlavə edib ki, 2010-ci ildə Türkiyə və Azərbaycan arasında imzalanan strateji tərəfdaşlıq sazişiylə hərbi təlimlər dönəmi başlayıb:
"Həmin təlimlər fonunda fəaliyyətlər davam etməkdədir. 2010-ci ildə imzalanan razılaşmadan sonra Qarabağ zəfəriylə gələn Şuşa Bəyannaməsi də çox önəmlidir. Bu bəyannamə ilə hər iki ölkə ərazi bütövlüyünə olunan iddiaları öz torpaqlarına edilən kimi görür. Bu isə Türkiyə və Azərbaycanın strateji əlaqələrinin ən yüksək səviyyəyə qalxması deməkdir. Təhlükəsizlik sahəsində milli müdafiə qurumları və kəşfiyyat təşkilatları arasında fəaliyyətlər, həmçinin Türkiyənin Türksat peykindən əldə olunan məlumatların paylaşılması qarşılıqlı həyata keçirilir. Son olaraq HAKİM layihəsi ilə Türkiyə və Azərbaycan hava sahəsi müştərək hala gəlib. Dolayısıyla da Antalya körfəzindən Xəzər sahillərinə qədər ərazilərdə havada meydana gələ biləcək təhlükələr kontrol mərkəzləri sayəsində idarə edilə bilər vəziyyətə gəlib. Bütün bunların fonundacTürkiyə və Azərbaycan hərbi münasibətləri dünyada heç bir iki ölkə arasında olmayan bir səviyyəyə qalxıb. Yəni Bakının təhlükəsizliyi Ankaradan, Ankaranın təhlükəsizliyi isə Bakıdan keçir. Türk Dövlətləri Təşkilatın yaranmasının səbəblərindən biri də Azərbaycan-Türkiyə əlaqələridir. Bakı və Ankara münasibətləri TDT-ı üçün əsas modellərdən biridir”.
