Gürcüstanın hakim “Gürcü Arzusu” partiyası Vahid Milli Hərəkat Partiyasının (VMHP) konstitusiyaya zidd elan edilməsi ilə bağlı iddia ərizəsinin mətnini hazırlamağı yekunlaşdırmaq üzrədir.
APA-nın yerli bürosu xəbər verir ki, bu barədə partiyanın parlament çoxluğunun lideri İrakli Kirtsxaliya brifinqdə bildirib.
Onun sözlərinə görə, parlamentin müvəqqəti komissiyasının rəyi əsasında hazırlanan iddia yaxın vaxtlarda Gürcüstanın Konstitusiya məhkəməsinə təqdim ediləcək.
İ.Kirtsxaliya qeyd edib ki, VMHP-nin konstitusiyaya zidd elan edilməsinə nail olmaq “Gürcü Arzusu”nun seçkiöncəsi ən mühüm vədlərindən biri olub.
Qeyd edək ki, parlamentin müvəqqəti komissiyası 2003-2012-ci illərdə hakimiyyətdə olan hökümətin dövründə törədilmiş cinayət faktlarının yer aldığı təqribən 500 səhifəlik hesabat hazırlayıb.
Xatırladaq ki, VMHP-ni 2001-ci ildə Gürcüstanın sabiq Prezidenti Mixeil Saakaşvili təsis edib. Siyasi birlik 2004-2012-ci illərdə Gürcüstanın hakim partiyası olub.
