Bir neçə il öncə aeroportların icarəyə verilə bilməsi ilə bağlı məsələ qaldırmışdım.
Aydın oldu ki, vermək olar. Bizim regionlarda aeroportlar tikilib. Problem budur ki, gündə 1-2 reys olsa, toy-bayramdır.
“APA-Economics” xəbər verir ki, bunu Milli Məclisin İqtisadi siyasət sənaye və sahibkarlıq komitəsinin iclasında “Aviasiya haqqında” yeni qanun layihəsinin müzakirəsi zamanı deputat Rüfət Quliyev bildirib.
“Əgər yenə də bu aeroportların saxlanılması üçün büdcədən vəsait ayrılırsa, tenderə buraxılması ilə bağlı hansı işlər görürük? Türkiyənin böyüklüyünə görə ikinci aeroportu İndoneziya şirkəti, Gürcüstan aeroportları isə Türkiyə şirkətləri tərəfindən icarəyə götürülüb. Digər məsələ budur ki, bu yaxınlarda “Utair” şirkəti vasitəsilə Bakı-Sankt-Peterburq-Bakı reysindən istifadə etdim. Təyyarədə ekonom sinifdə uçan sərnişinlər üçün yemək, su vermirlər. Qiymət isə 250 manatdır. Mənə maraqlıdır ki, xarici şirkətlər burada fəaliyyətə başlayanda bizim tərəfdən hər hansı tələb qoyulurmu? Biz standartlardan danışırıq. Aviaşirkətlər Azərbaycana gəlib iş görür gedirlər. Belə uzunmüddətli uçuşlar zamanı sərnişinlər yemək ala bilmirlər” – deyə deputat vurğulayıb.
Açıqlamanı "Sherg.az"a şərh edən iqtisadçı ekspert Eldəniz Əmirov söyləyib ki, Azərbaycanda aeroportların saxlanılması və mülki aviasiya ilə bağlı xüsusi bir şey düşünməyə ehtiyac yoxdur:
"Sadəcə olaraq Azərbaycana uyğun olan və uğur qazanmış xarici təcrübəni götürüb tədbiq etmək lazımdır. Ümumiyyətlə aviaşirkətlə hava limanının eyni subyektin olması problem yaradır. Ona görə də ayrı-ayrı subyektlərə vermək lazımdır ki, rəqabət mühiti yaransın və bu sahədə inkişaf olsun".
