2024-cü ilin yanvar – oktyabr aylarında Türkiyənin Azərbaycana avtomobil ixracı ötən ilin eyni dövrü ilə müqayisədə 16,3 faiz azalaraq, 76 milyon dollara bərabər olub.
Trend xəbər verir ki, bu barədə TurkicWorld-ə Türkiyə Ticarət Nazirliyindən bildiriblər.
“Bu ilin oktyabr ayında Türkiyə Azərbaycana 8,3 milyon dollar məbləğində avtomobil ixrac edib ki, bu da keçən ilin oktyabr ayı ilə müqayisədə 20 faiz azdır” – deyə nazirlikdən bildirilib.
Qeyd edək ki, 2024-cü ilin yanvar-oktyabr aylarında Türkiyənin avtomobil ixracı ötən ilin eyni dövrü ilə müqayisədə 6,5 faiz artaraq, 30 milyon 511 min 79 dollara bərabər olub.
“Bu ilin oktyabr ayında Türkiyə 3 milyon 581 min 928 dollar məbləğində avtomobil ixrac edib ki, bu da keçən ilin oktyabr ayı ilə müqayisədə 16,4 faiz çoxdur” – deyə nazirlikdən bildirilib.
Qeyd olunub ki, son 12 ay ərzində (oktyabr 2023-oktyabr 2024) Türkiyə 36 milyon 848 min 952 dollar məbləğində avtomobil ixrac edib.
Avtosfer.az saytının baş redaktoru, nəqliyyat eksperti Elməddin Muradlı "Sherg.az”a bildirib ki, bu sahədə iki ölkə arasında əməkdaşlıq və tərəfdaşlıq davam edir:
“Daha çox sərnişin daşıma sahəsində istifadə olunan avtomobillər və avtobuslar Türkiyədən alınır. Ola bilsin artıq bu il Azərbaycan Çindən elektrikli avtobus alsın. Yəqin ki, qardaş ölkə də bu sahədə istehsal başlayanda proses yenə də davam edəcək. Həmçinin bu azalma Türkiyənin özünün daxili istehsalının azalması ilə də bağlı ola bilər. Yəni məsələyə bir tərəfli yanaşmaq lazım deyil. Çünki müxtəlif səbəblərdən dolayı azalma baş verə bilər. Azərbaycan müəyyən məhsulların, malların alış və satışında hər zaman qardaş Türkiyəyə üstünlük verir. Bu avtomobil sahəsində də belədir. İstehsal artdıqca qardaş ölkənin istehsal etdiyi avtomobil və digər məhsulları almağa maraq göstəririk. Düşünürəm ki, bu avtobuslarla bağlıdır. Çünki avtobuslar alınan əsas avtonəqliyyat vasitəsi idi. Ancaq bu ildən Azərbaycanda elektrik avtobuslarına üstünlük verilir. Bu yaxınlarda ölkəmizə 161 ədəd elektrik avtobusu gətirildi. Artıq yarısı istismara verilib, digər yarısı isə ilin sonuna kimi tam istismara veriləcək”.
