Dünya bazarlarında “Azeri Light” (CIF) markalı Azərbaycan nefti ucuzlaşıb.
Azərbaycan neftinin bir bareli üzrə qiyməti ötən günlə müqayisədə 2,14 ABŞ dolları və ya 2,19% azalaraq 95,54 ABŞ dolları təşkil edib.
Xatırladaq ki, “Azeri Light” markalı neftin bir barelinin qiyməti 2020-ci ilin aprel ayında minimal səviyyəyə düşərək 15,81 ABŞ dolları olub, 2008-ci ilin iyulunda isə maksimum qiymətə - 149,66 ABŞ dollarına satılıb.
Neftin qiymətinin azalması ilə bağlı “Sherg.az”a danışan iqtisadçı ekspert Natiq Cəfərli bildirib ki, neftlə bağlı gündəlik qiymət dəyişiliklərinin analiz edilməsi və bu yöndə proqnozların verilməsi çətin məsələdir:
“Çünki neft bazarı dinamikdir. Bu bazarda daim dəyişiliklərin şahidi oluruq. Neftin qiyməti İsrail və HƏMAS qarşıdurmasının başlarında kəskin sürətdə artdı. Sonradan yerüstü əməliyyatların təxirə salınması neftin qiymətlərində enmələrə səbəb oldu”.
N.Cəfərli ümumiyyətlə neft qiymətlərinin yarım illik və illik dəyərləndirilməsinin daha məqsədə uyğun olduğunu vurğulayıb:
“Bu il ərzində neft qiymətləri Azərbaycan üçün kifayət qədər komfortlu zonadadır. Azərbaycan neftinin qiyməti 85-95 dollar arasında dəyişir. Bu da Azərbaycan üçün kifayət qədər gəlirli və valyuta daxil olmalarını artıran amildir. Ona görə də neftin qiymətinin hansı yöndə gedəcəyi geosiyasi gərginliklərin artması və azalmasından asılı olacaq. Əgər Yaxın Şərqdə geosiyasi gərginlik azalarsa, neftin qiyməti bir o qədər də azala bilər. Əksi müşahidə olunarsa, yəni gərginlik artarsa, neftin qiyməti 100 dolları belə keçə bilər”.
