"Bu vasitələrdən biri də məhz internet televiziyalarıdır"
Azərbaycan Respublikası Baş nazirinin müavini, Yeni Azərbaycan Partiyası Sədrinin müavini-İcra katibi Əli Əhmədov xaricdə fəaliyyət göstərən siyasi mühacirlərlə bağlı feysbuk hesabında paylaşım edib. O, bildirib ki, hazırda ölkələrin daxili işlərinə qarışmağın, onlara qarşı təbliğat aparmağın, seçki proseslərinə müdaxilə etməyin yeni forması sınaqdan keçirilir. Bunlardan biri internet televiziyalardır:
“Müxalifəti dəstəkləməyin və maliyyələşdirməyin yeni forması kimi internet televiziyalardan və digər texnologiyalardan geniş istifadə edilir. Ən acınacaqlısı da odur ki, ayrı-ayrı yad və təhlükəli maraqlar naminə Azərbaycana qarşı çirkin yalan və böhtan kampaniyası siyasi mühacir kimi sığınacaq verilmiş və təbii ki, satılmış azərbaycanlı müxalifət təmsilçiləri tərəfindən aparılır. Yalnız sadəlövh adamlar düşünə bilər ki, internet TV-lər məhdud maliyyə resursları ilə yaradılır və işlədilir. Xeyr. Sığınacaq tapdığı ölkədə heç bir işlə məşğul olmayan insanın malik olduğu resurslar internet TV işlətmək kimi heç də az vəsait tələb etməyən məşğuliyyətlə adekvat deyil. Sizi əmin edirəm ki, həmin adamlara lazımınca maliyyə dəstəyi edilir. Sözügedən TV sahiblərindən biri təkcə reklamına ayda 10 min dollar pul xərcləyir. Deməli, söhbət Azərbaycana qarşı geniş təbliğat şəbəkəsinin yaradılmasından gedir və bir daha təkrar edirəm ki, bu iş Azərbaycanın müxalifətinin bəzi təmsilçilərinin əli ilə həyata keçirilir”.
Maraqlıdır, ölkəmizə qarşı təbliğat aparan mühacirlərin sahibi olduğu internet televizyalarının maliyyə mənbəyi haradan qaynaqlanır?
Məsələ ilə bağlı Sherg.az-a danışan “Səs” qəzetinin baş redaktoru Bəhruz Quliyev bildirdi ki, günü-gündən Azərbaycanın inkişafını gözü götürməyən bəzi qüvvələr məhz internet televiziyası vasitəsilə öz təbliğatlarını aparırlar.
Baş redaktorun sözlərinə görə, müxtəlif beynəxalq təşkilatların layihələri var ki, onlar müəyyən dövrlərdə ölkələrə qarşı təxribatlar hazırlayırlar:
“Şərq və müsəlman ölkələrinə baxanda son dövrlər baş verən təxribatlarda bəzi dairələrin və fondların əli ilə müxtəlif dövlətlərin daxili işinə müdaxilələr olunur. Hətta hakimiyyətlə xalqın birliyi olmayan dövlətlərdə çevirilişlər baş verir. Rəsmi inqilablar silsiləsi buna bariz nümunədir. Bu gün mühacirlərin həyata keçirdiyi layihə vasitələrindən biri də məhz internet üzərindən yayımlanan görnütülü resurslardır. Əli müəllimin də dediyi kimi, bu gün ən aktual məsələ internet televiziyalarıdır. Amma təkcə internet televiziyaları deyil, internet üzərində təbliğat aparmaq mexanizmi güclüdür. İnternet televiziyaları isə görüntülü olduğu üçün insanlara ciddi təsir edə bilir”.
B.Quliyev qeyd edib ki, Azərbaycanı sevməyən, inkişafımızı görmək istəməyən, daxili və xarici siyasətimizin əleyhinə kampaniya aparan bəzi qurum və fondlar narahatdır:
“Ölkəmizin inkişafı həqiqətən də onlara xoş deyil. Onları narahat edən məqamlardan biri də Azərbaycanın müstəqil siyasət yürütməsidir. Ona görə də müxtəlif vasitələrlə dövlətimizə təzyiq göstərməyə çalışırlar. Bu vasitələrdən biri də məhz internet televiziyalarıdır. Hansı ki, bu gün Azərbaycana qarşı aparılan mənəvi və əxlaqi terror kampaniyası məhz həmin televiziyalar vasitəsilə həyata keçirilir”.
Mühacirələrin internet TV-lərinin maliyyələşməsinə gəlincə, baş redaktor vurğulayıb ki, ölkəmizə qarşı olan müəyyən fond və qurumlar siyasi mühacirlərə maddi yardım göstərirlər:
“Onlar ölkəmizin mənəvi dəyərlərini aşağılamağa, əxlaqi keyfiyyətlərimizi deqradasiyaya uğratmağa çalışırlar. Bu istiqamətdə internet televiziyası vasitəsilə müxətlif layihələri həyata keçirirlər. Məlumdur ki, bu gün internet sözün əsl mənasında dünyanı idarə edir. Biz internet üzərindən yayılan informasiyalara baxırıqsa, onun populyarlığını təsdiq etmiş oluruq. Videoların reytinqi artıqca həmin televiziyaların reklam almaq imkanları artır. Belə olduğu halda müxtəlif beynəlxalq xarici şirkətlər və Azərbaycana qarşı olan fondlar bu reklamlarda maraqlı olurlar. Beləliklə onlar, ölkəmizin əleyhinə yönləndirilmiş missiyadan məharətlə istifadə edirlər”.
