Ölkədə son dövrlər bir sıra qəzetlərin fəaliyyətini dayandırması ictimai müzakirələrə səbəb olub.
Bəzi insanlar hesab edirlər ki, rəqəmsal medianın sürətli inkişafı ilə qəzetlərə artıq ehtiyac qalmayıb.
Təhlilçilərin fikrincə, qəzetlər sadəcə xəbər mənbəyi deyil, həm də maarifləndirici və analitik materialların təqdim olunduğu mühüm platforma olmalıdır.
Noyabrın 7-də Azərbaycan Milli Elmlər Akademiyasının (AMEA) Mərkəzi Elmi Kitabxanasında Medianın İnkişafı Agentliyi (MEDİA) və Mətbuat Şurasının birgə təşkilatçılığı ilə keçirilən “Mediada Azərbaycan ədəbi dilinin normalarının düzgün tətbiqi” mövzusunda konfransda çıxış edən Medianın İnkişafı Agentliyinin icraçı direktorunun müavini Natiq Məmmədli bildirib ki, insanlar gözəl danışmağı, fikirlərini düzgün və aydın şəkildə ifadə etməyi şifahi formada televiziya və radiodan öyrənirlər.
Onun sözlərinə görə, yazılı formada fikrin ifadə meydanı isə qəzetlərdir.
Natiq Məmmədli əlavə edib ki, bu sahəni dəstəkləmək və daha təkmil səviyyəyə qaldırmaq vacibdir.
Gununsesi.info
