Dünya Mətbuat Fotoqrafiyası Vəqfi tərəfindən təşkil edilən illik mükafat mərasimi ilə 2025-ci ilin “İlin Mətbuat Fotosu” mükafatının qalibi açıqlanıb. “The New York Times” qəzetinin fotoqrafı Samar Abu Elouf, müharibədə qollarını itirmiş bir qəzzalı uşağın portreti ilə mükafata layiq görülüb.
Sherg.az xəbər verir ki, münsiflər heyəti, bu il seçilən qalib fotoya dair belə açıqlama verib:
“Bu, yüksək səslə danışan səssiz bir fotodur.”
“Aged Nine” (Doqquz yaşında) adlı şəkildə, İsrailin Qəzzaya hücumu zamanı qollarını itirmiş 9 yaşlı fələstinli uşaq Mahmud Ajjour yer alır. Bu ürəkağrıdan görüntü, Samar Abu Elouf tərəfindən “The New York Times” üçün çəkilib.
Fotoqraf Ebu Elouf deyib:
“Mahmudun anasının mənə danışdığı ən təsirli sözlərdən biri o idi ki, Mahmud qollarının olmadığını anlayanda anasına dediyi ilk söz bu olmuşdu:
"Səni necə qucaqlayacağam?’”.
Balaca Mahmud, həm qollarını, həm də azı 51 min fələstinli soydaşını itirdiyi hücumların ardından müalicə üçün Qətərin paytaxtı Dohaya aparılıb.
Qeyd edilir ki, fotonun müəllifi də Qəzzalıdır və hazırda Dohada müharibədə ağır yaralanmış fələstinlilərin şəkillərini çəkir.
Dünya Mətbuat Fotoqrafiyası Vəqfinin icraçı direktoru Cumana əl-Zeyn Xuri isə qalib foto haqqında belə deyib:
“Bu foto təkcə bir uşağın hekayəsini deyil, nəsillər boyu davam edəcək daha geniş bir müharibəni əks etdirir.”
