Qarşılıqlı səfərlər sülhün açarı ola bilər
Azərbaycan və Ermənistan vətəndaş cəmiyyəti nümayəndələri arasında İrəvanda keçirilən görüş qarşılıqlı etimadın bərpası istiqamətində mühüm addımdır. Sülh prosesinə vətəndaş cəmiyyətinin cəlb edilməsi önəmlidir. İndiyə qədər hər iki ölkənin müxtəlif ictimai-siyasi xadimlərinin, jurnalistlərinin, idmançılarının və bəzi hallarda deputatların müxtəlif tədbirlər çərçivəsində Azərbaycan və Ermənistana səfərləri baş tutmuşdu. Lakin bu dəfə reallaşdırılmış səfər sırf ikitərəfli təşəbbüsün və çərçivənin nəticəsidir. O baxımdan budəfəki səfər yüksək qiymətləndirilir. Sözügedən təmaslar iki ölkə arasında dialoqun artıq yalnız hökumətlər və diplomatik kanallarla deyil, həm də ictimai sferada aparıldığını göstərir. Belə görüşlərdə cəmiyyətlərin yaxınlaşması və birgəyaşayış mədəniyyətinin formalaşdırılması əsas müzakirə mövzularından olur. Azərbaycan və Ermənistan vətəndaş cəmiyyətlərinin birbaşa dialoqa girməsi gələcəkdə ikitərəfli əməkdaşlıq formatının genişlənməsi üçün ümid yaradır. Hesab edilir ki, belə təşəbbüslərin davamlı olması iki ölkə arasında normallaşma prosesini gücləndirə bilər. Sonrakı periodda ziyalılar, alimlər, mədəniyyət xadimləri, ələlxüsus geniş auditoriyalara çıxış imkanları olan media təmsilçilərinin ikitərəfli görüşləri etimad mühitinin formalaşmasına daha çox töhfə verə bilər. Nəzərə alınmalıdır ki, bu, hələ başlanğıcdır, qarşıda hər iki xalqı uzun proses gözləyir.
Sülh prosesində vətəndaş cəmiyyətinin iştirakının önəmindən danışan Mətbuat Şurasının İdarə Heyətinin sədri, "525-ci qəzet"in baş redaktoru, Azərbaycan Yazıçılar Birliyinin sədr müavini Rəşad Məcid Sherg.az-a deyib ki, QHT nümayəndələrinin İrəvana səfərinə dair məlumatları izləyib. MŞ rəhbəri vurğulayıb ki, həm QHT rəhbəri Fərhad Məmmədovun, həm də "1news.az" saytının baş redaktoru Kəmalə Məmmədovanın səfər barədə fikirləri ilə tanış olub:
"Mən belə təmasları müsbət qiymətləndirirəm. Hamımız Azərbaycan və Ermənistan arasında sülh sazişinin imzalanacağını gözləyirik. Bugünlərdə Azərbaycan ərazisindən tranzit kimi Ermənistana Qazaxıstan taxılı keçirildi. Hesab edirəm ki, münasibətlərin tənzimlənməsi istiqamətində ictimaiyyətdə təbliğat yönündə müəyyən işlər aparılmalıdır. Şübhəsiz ki, vətəndaş cəmiyyətlərinin görüşü bu istiqamətdə tədbirlərin başlanğıcıdır, ilkin təşəbbüslərdir. Bunun ardınca, digər təmaslar da olacaq. Vaxtı ilə Azərbaycanın media nümayəndələrinin Ermənistana səfərləri olub. Qarşılıqlı səfərlər baş tutub. Artıq məqam yetişib ki, yenə də bu cür səfərlər təşkil olunsun. Əlbəttə, arzulayaram ki, Ermənistan KİV nümayəndələri Azərbaycana gəlsinlər, Bakıda olsunlar. Bakının inkişafını gözləri ilə görsünlər. Eyni zamanda işğaldan azad olunmuş torpaqlarda, Qarabağ və Şərqi Zəngəzurda aparılan bərpa-quruculuq işləri ilə tanış olsunlar. Qarşılıqlı səfərlər həm də etimad mühitinin yaranmasında bir vasitədir. İnanıram ki, bu cür səfərlər davamlı olacaq".
