ATƏT-in Minsk Qrupunun həmsədrləri regiona növbəti səfərlərini ediblər. Dünən diplomatlar Yerevanda olub, Ermənistanın baş naziri Nikol Paşinyanla görüşüblər. Bu gün isə həmsədrlər Qarabağa gələrək erməni separatçıları ilə görüş keçiriblər. Minsk Qrupu üzvləri Bakıya da gəlib, rəsmilərlə görüşəcəklər.
Ekspertlər diplomatların regiona növbəti gəlişlərini dəyərləndirərkən, bunun da əvvəlkilər kimi mənasız səfər olduğunu deyirlər.
Politoloq Natiq Miri hesab edir ki, həmsədrlərin gəlişi və keçirdikləri görüşlər sadəcə formal xarakter daşıyır. Analitik Sherg.az-a deyib ki, ortada Dağlıq Qarabağ probleminin həlli istiqamətində konkret müzakirə obyekti və plan yoxdur:
"Sənəd olmadıqdan sonra səfərlərin hansısa ciddi siyasi dəyişikliklə nəticələnəcəyini düşünmürəm. Bu, sadəcə protokol və hesabat xatirinə edilən səfərlərdir".
Politoloq: "Azərbaycan bəzi strateji əhəmiyyətli əraziləri azad etdikdən sonra, həm yeni bir mərhələnin əsası qoyulacaq, həm də proses bizim xeyrimizə dəyişəcək"
N.Miri vurğulayıb ki, Azərbaycan Qarabağ münaqişəsinin sülh yolu ilə həlli istiqamətində ciddi addımlara hazır olsa da, rəsmi Yerevan istəkli görünmür:
"Paşinyan hökuməti və qondarma "DQR" buna hazır deyil. Sülhlə bağlı dedikləri, Paşinyanın boğazdan yuxarı sözləridir. Ona görə də səfərlərdən hansısa ciddi nəticə gözləmək mümün deyil. Ümumiyyətlə hesab edirəm ki, bundan sonra Dağlıq Qarabağ probleminin sülh yolu ilə həlli yoxdur. Düşünürəm ki, Azərbaycan Ermənistanla, xüsusilə Paşinyan hökuməti ilə artıq danışıqları dayandırmalıdır. Çünki uzanan danışıqlar Ermənistana vaxt qazandırır. Azərbaycan 27 il ərzində sülh tərəfdarı olduğunu göstərdi. Bura qədər səbr yetərlidir. Azərbaycan danışıqları dayandırdığını elan etməli və bundan sonra paralel şəkildə həm hərbi, həm də diplomatik fəaliyyətə keçməlidir. Yaxın zamanda Azərbaycan lokal ildırımsürətli hərbi əməliyyatlarla xeyli ərazini işğaldan azad etməlidir. Təbii ki, beynəlxalq güclər uzunmüddətli müharibəyə icazə verməyəcəklər. Lakin Azərbaycan bəzi strateji əhəmiyyətli əraziləri azad etdikdən sonra, həm yeni bir mərhələnin əsası qoyulacaq, həm də proses bizim xeyrimizə dəyişəcək. Danışıqlar masasında diktə edən tərəf artıq biz olacağıq".
Kənan Novruzov
