“Xudafərin körpüsünün əsgərlərimizin nəzarəti altına keçməsi İranla əlaqəni kəsdi”
“Bildiyiniz kimi, İrandan düşmənə müxtəlif təminat növləri, hətta mən bildiyimə görə, silah-sursat da daşınırdı”
Tarixi romanlar müəllifi Fərman Kərimzadənin “Xudafərin körpüsü” əsərini oxuyarkən adətən dərin bir ah çəkir, kitabın üz qabığındakı fotoya həsrətlə baxırdıq. Nəhayət, intizar bitdi. Əsrlər əvvəl tarixi Azərbaycan dövləti- Səfəvilərin nəzati altında olan körpüdə yenə də azərbaycanlılar addımlayacaq. Təbii ki, şücaətli ordumuza dualar, alqışlar edərək.
Məlum olduğu kimi, dünən Azərbaycan Silahlı Qüvvələri daha bir ərazini- Xudafərin körpüsünü düşməndən azad etdilər. Bu barədə cənab prezident, Ali baş komandan İlham Əliyevin yazdığı “Tvit”lə sanki ürəyimizə su səpildi. Hələ 1027-ci ildə tikilən körpü, nəhayət, öz tarixi sahiblərinə qayıtdı. Gözün aydın, Azərbaycan!
Ordumuzun sözügedən uğuru barədə “Sherg.az”a danışan ehtiyatda olan polkovnik Şair Ramaldanov bu ərazinin əhəmiyyətindən söz açıb:
“Xudafərin körpüsünün azad edilməsi ilk növbədə mənəvi-psixoloji üstünlükdür. Bu amil hətta silah-sursat tədarükündən də vacibdir. Çünki silahı da inamla idarə etmək lazımdır. Ordumuz indi özünə daha çox inanır.
Bu isə düşməndə panika və qorxu ilə nəticələnir. Erməni hərbçiləri, hətta xüsusi təyinatlı qüvvələri də artıq geri çəkilir, döyüşə girməkdən imtina edirlər. Bu, bizim mənəvi- psixoloji üstünlüyümüzün əsas təzahürüdür.
İkinci bir tərəfdən bildirim ki, hərbi əməliyyatlar plan üzrə gedir. Bir yerin düşməndən təmizlənməsi başqa bir əraziyə girməyimiz üçün şərait yaradır. Hər halda ordumuz artıq yeni istiqamətlər üzrə irəliləyir”.
Ş.Ramaldanov, həmçinin başqa bir məqama da aydınlıq gətirib:
“Biz adətən sağ və sol cinaha eyni dərəcədə diqqət göstəririk. Amma sol cinahda artıq xeyli irəliləmişik. Xudafərin körpüsünün əsgərlərimizin nəzarəti altına keçməsi İranla əlaqəni kəsdi. Bildiyiniz kimi, İrandan düşmənə müxtəlif təminat növləri, hətta mən bildiyimə görə, silah-sursat da daşınırdı. İndi bunun qarşısı alınacaq.
Deməli, biz həm də sağ cinahımızı daha da möhkəmləndirməyə imkan qazanmışıq”.
