Yeni milli hökumət Ankaranın dəstəyi ilə qarşısındakı əngəlləri yavaş-yavaş aradan qaldıracaq
“Ələvilərin, dürzilərin etirazları nəticəsiz qalacaq. Kürdlər Suriyanın ərazi bütövlüyünü qəbul edirlər, sadəcə, kənar qüvvələr onları "barmaqlayır"
Suriyada Türkiyə və İsrailin qarşıdurması fonunda gərginlik artır. Dürziləri dəstəkləyən İsrailin muxtariyyət istəklərindən sonra PKK-nın Suriya qanadı olan PYD və YPG də “dövlət qurmaq” istiqamətində işləyir. Əsədin devrilməsindən sonra bu qüvvələrin Suriyanın yeni hakimiyyəti ilə anlaşacağı gözlənilsə də, xarici oyunçuların dəstəyi ilə “muxtar dövlət” planları yenidən dövriyyəyə girib. Ekspertlərin fikrincə, Suriyanın şimal-şərqində, Türkiyə ilə sərhəddə yerləşən Qamışlı bölgəsində keçirilən “kürd milli birlik konfransı” parçalanma cəhdlərinin başlanğıcı hesab oluna bilər. Konfrans PYD/YPG terrorçularının təmsil olunduğu “Suriya Demokratik Gücləri” (SDG) ilə Bərzaniyə yaxın olan ENKS adlı qruplaşma tərəfindən təşkil olunub. Konfransa ABŞ, Fransa, İngiltərə, Hollandiya və bəzi ərəb ölkələrindən nümayəndələr qatılıb. Yekun bəyanatda “muxtariyyət, müstəqil dövlət” kimi istəklər yer alır. Bu toplantıya sərt reaksiya verən Türkiyə “Suriyanın unitar quruluşunun pozulmasına icazə verməyəcəyik” deyib.
AĞ Partiya sədrinin müavini Əhəd Məmmədli Sherg.az-a deyib ki, Suriyada indiki vəziyyət ona bir vaxtlar Rusiyada baş verən prosesləri xatırladıb. Ekspert vurğulayıb ki, Rusiyada bolşeviklər iqtidara gələndən sonra bir çox qüvvələr fəallaşmışdı:
"Bir tərəfdən kəndli üsyanları, "ağ"ların hərəkatı, digər yandan milli respublikaların mübarizəsi geniş vüsət almışdı. Amma bolşeviklər mərhələli şəkildə önlərindəki bütün "əngəlləri" aradan qaldırdılar. Nəticədə SSRİ adlı böyük bir imperiya qurdular. Mən bolşevikpərəst, kommunist deyiləm, amma real vəziyyəti göstərmək üçün bunları deyirəm. Proseslərə peşəkar yanaşmaq lazımdır. Suriyada 50 illik Əsəd rejimi devrilib və yeni milli hakimiyyət qurulub. Onillərlə davam edən diktatura devrilib. Yeni hökumətin də əsas dəstəkçisi Türkiyədir. Suriyada indiyədək vəziyyət elə olub ki, müxtəlif dövlətlər, xarici dairələr orada öz maraqlarını təmin etməyə çalışıblar. Həmin qüvvələr öz əlaltıları sayəsində yenə də Suriyada həmin qarışıq dövrü bərpa etmək istəyirlər. Bu, bir ssenaridir. Suriyada maraqlı dövlətlər - İran, Rusiya, İsrail, Qərb dövlətlər və s. çoxdur".
Ə.Məmmədli əlavə edib ki, Suriyada vahid hökumətin, güclü dövlətin formalaşmasını, ölkənin ərazi bütövlüyünün bərpa olunmasını istəməyənlər var:
"Suriya hökumətinə Türkiyənin dəstəyi də həmin ölkələrdə narazılıq yaradır. Amma bacarmayacaqlar. Suriyanın yeni milli hökuməti Türkiyənin dəstəyi ilə qarşısındakı əngəlləri yavaş-yavaş aradan qaldıracaq. Ələvilərin, dürzilərin etirazları nəticəsiz qalacaq. Kürdlər Suriyanın ərazi bütövlüyünü qəbul edirlər, sadəcə, kənar qüvvələr onları "barmaqlayırlar". Məqsəd Türkiyəni Suriyadan çıxarmaqdır. Suriyanın indiki rəhbərliyi illərin savaşından, ağır sınaqlarda, vətəndaş müharibəsindən üzüağ çıxıblar. Suriya xalqının əksəriyyəti milli hökuməti dəstəkləyir".
