Ermənistanla münasibətlərin normallaşması Azərbaycana yeni investisiya imkanları aça bilər.
“APA-Economics” xəbər verir ki, bu barədə Niderlandın ən böyük maliyyə qrupu olan “ING Group”dan bildirilib.
Bildirilib ki, Azərbaycanla Ermənistan arasında münasibətlərin normallaşması prosesi beynəlxalq investorlar tərəfindən müsbət siqnal kimi qiymətləndirilir.
Analitiklər hesab edirlər ki, bu proses davam edərsə, ölkəyə xarici kapital axınında artım müşahidə oluna bilər.
Moody’s beynəlxalq reytinq agentliyi, Fitch-in ardınca, Azərbaycana “Baa3” səviyyəsində investisiya reytinqi verib və müsbət proqnoz açıqlayıb. Agentlik bu qərarını fiskal və xarici ehtiyat buferlərinin güclənməsi, eləcə də diplomatik münasibətlərin inkişaf potensialı ilə əsaslandırıb.
Bununla belə, ölkənin ticarət balansı neft bazarındakı dəyişkənlik fonunda zəifləyir. 2025-ci ilin may ayına qədər olan 12 ayda Azərbaycanın xarici ticarət profisiti 2,7 milyard dollar təşkil edib. Bu göstərici 2024-cü ildə 5,5 milyard dollar, 2023-cü ildə isə 16,6 milyard dollar idi.
Analitiklərin hesablamalarına görə, neftin hər barel qiymətindəki 1 ABŞ dolları dəyişiklik Azərbaycanın illik yanacaq ixracında təxminən 350 milyon dollar fərq yaradır. Bu, neft bazarındakı dalğalanmaların ölkənin ticarət göstəricilərinə nə dərəcədə həssas olduğunu nümayiş etdirir.
“Bununla belə, kapital axınlarının güclənməsi və xarici reytinqlərin müsbətə doğru dəyişməsi cari təzyiqləri yumşaldır. Moody’s və Fitch tərəfindən verilən investisiya səviyyəli reytinqlər, Azərbaycanın beynəlxalq bazarlarda etibarlı tərəfdaş kimi mövqeyini möhkəmləndirir”, - “ING Group” əlavə edib.
