ABŞ-nin region ölkələrindəki hərbi bazaları İrana qarşı hücumlarda istifadə olunacağı təqdirdə, həmin mövqelər İslam Respublikasının qanuni hədəfinə çevriləcək.
"Report" "Tasnim" agentliyinə istinadən xəbər verir ki, bunu İranın xarici işlər naziri Abbas Əraqçi xatırladıb.
"Biz region ölkələrinə xəbərdarlıq etmişdik ki, əgər ABŞ bazaları İrana qarşı təcavüzdə iştirak edərsə, bizim qanuni hədəfimizə çevriləcək", - o bildirib.
A. Əraqçi vurğulayıb ki, İranın cavabı region ölkələrinin ərazisinə yox, ABŞ bazalarına yönəlib: "Bu kontekstdə Səudiyyə Ərəbistanının xarici işlər naziri ilə davamlı təmaslarımız olub.
Regionun bir çox ölkələri öz hava məkanından və ərazilərindən İrana qarşı istifadə olunmasının əleyhinə idi, lakin təəssüf ki, ABŞ bu imkanlardan bizə qarşı istifadə edib".
Xatırladaq ki, fevralın 28-də ABŞ və İsrail İrana qarşı hərbi əməliyyatlara başlayıb və bir sıra şəhərlərə hava zərbələri endirilib. Həmin gün zərbələr nəticəsində İranın Ali rəhbəri Əli Xamenei öldürülüb. İran buna cavab olaraq İsrail ərazisinə və Fars körfəzi ölkələrindəki ABŞ hərbi bazalarına hücum edib.
İran, ABŞ və onların müttəfiqləri aprelin 8-ə keçən gecə atəşkəs razılaşmasına nail olublar. Tramp sonradan atəşkəsi qeyri-müəyyən müddətə uzadıb.
Tərəflər münaqişəni həll etmək üçün Pakistanda danışıqlar aparıblar, lakin 11-12 apreldə keçirilən ilk raund heç bir nəticə verməyib.
ABŞ Tehrana təzyiq göstərmək üçün İran limanlarını və Hörmüz boğazından keçidi blokadaya alıb. İran da öz növbəsində Fars körfəzinə gedən gəmilər üçün Hörmüz boğazının bağlandığını elan edib. Regionda dinamik şəkildə dəyişən vəziyyət qlobal enerji böhranına səbəb olub.
Hazırda problemin aradan qaldırılması üçün ABŞ ilə İran arasında danışıqlar prosesi davam edir.
Qeyd edək ki, Hörmüz boğazına nəzarət ABŞ ilə İran arasında anlaşma memorandumunun razılaşdırılmayan bəndlərindən biridir. Tərəflər bu məsələdə ortaq məxrəcə gələ bilsə, İslam Respublikasının zənginləşdirilmiş uranı ölkədən çıxarması əsas müzakirə mövzusu olacaq. İranın dondurulmuş səhmlərinin sərbəst buraxılması və ölkəyə qarşı tətbiq olunan sanksiyaların aradan qaldırılması isə həllə ən yaxın məsələlərdir.
Digər mübahisəli məsələ İsrailin Livana qarşı hücumlarının dayandırılmasıdır. Qeyd edək ki, İsrail və Livan nümayəndə heyətləri ABŞ-dəki danışıqların nəticələrinə əsasən, atəşkəs rejiminin şərtlərinin yerinə yetirilməsinə dair razılığa gəlib. "Hizbullah" isə ABŞ-nin də dəstəklədiyi Livan-İsrail atəşkəs sazişini rədd edib.
