"Zəngəzur dəhlizinin açılmasını əngəlləyən məhz İran oldu".
Oxu.Az "Azad İran" "Telegram" kanalına istinadən xəbər verir ki, bunu İranın Ali Rəhbəri Əli Xameneinin müşaviri Əli Əkbər Vilayəti iddia edib.
"O vaxt bəzi dövlətlər Zəngəzur dəhlizi adı altında Naxçıvanla Azərbaycanı Ermənistan üzərindən birləşdirməyə cəhd edirdilər", - o bildirib.
Onun sözlərinə görə, guya bu plan əslində Ermənistanı parçalamaq, İranla Avropa arasında əlaqəni kəsmək məqsədi daşıyırdı.
"Keçmiş ABŞ prezidenti Co Baydenin özünün etiraf etdiyi kimi, bu dəhlizin açılması üçün hər şey hazır idi, ancaq İran onun həyata keçirilməsinə imkan vermədi", - Vilayəti vurğulayıb.
Onun sözlərinə görə, düşmənlərin Zəngəzur layihəsi ilə son məqsədi İranı şimaldan təcrid etmək, cənubdan isə Rusiyanı mühasirəyə almaq idi, ancaq bu plan də uğursuzluğa düçar olub.
