58 nəfər əcnəbi jurnalistə amnistiya verilməsi düzgün qərardır
Xarici İşlər Nazirliyi, Azərbaycan Mətbuat Şurası və Medianın İnkişafı Agentliyi Azərbaycan ərazilərinə qanunsuz səfər etmiş bəzi xarici media nümayəndələrinin “qara siyahı”dan çıxarılması ilə bağlı bəyanat yaydı. Bəyanatla 58 nəfərin adı XİN-in “qara siyahı”sından çıxarıldı. Xarici İşlər Nazirliyinin Mətbuat xidməti idarəsinin rəisi Ayxan Hacızadə bildirib ki, hər il onlarla şəxs adlarının "qara siyahı"dan çıxarılması üçün Azərbaycan hökumətinə rəsmi üzrxahlıq məktubu ünvanlayır və uyğun olduğu təqdirdə onların adları "qara siyahı"dan çıxarılır. Qeyd olunub ki, Azərbaycanda informasiya mühitində plüralizm mühiti əsas götürülür, yerli və xarici mətbuatın inkişafına hərtərəfli şərait yaradılır. Mətbuatın xüsusən Azərbaycan-Ermənistan münasibətləri, xarici mənfi ideoloji təsirlərə qarşı danılmaz rolu var. Bu baxımdan xarici KİV-in Azərbaycana səfərlərinin təşkili əsas istiqamətlərdən biridir.
Mətbuat Şurası İdarə Heyətinin üzvü Müşfiq Ələsgərli "Sherg.az"a açıqlamasında bildirib ki, torpaqlarımız işğal altında ikən ərazimizə qanunsuz səfər edən, təxribatçı informasiyalar yayan, Azərbaycan əleyhinə haqsız kampaniya aparan jurnalistlərin adları qara siyahıya salınırdı. M.Ələsgərlinin sözlərinə görə, adları "qara siyahı"ya düşmüş jurnalistlərin ölkəmizə girişinə qadağa qoyulurdu: "Bu, çox önəmli məsələdir. Çünki müharibədən əvvəl Qarabağa və işğal altındakı digər ərazilərimizə səfər etmiş əcnəbi KİV nümayəndələri həqiqəti əks etdirməyən informasiyalar yaymaqla beynəlxalq ictimaiyyəti çaşdırırdılar. Şükürlər olsun ki, Qarabağ regionu daxil olmaqla digər ərazilərimiz işğaldan azad edildi və nəzarətimiz tam bərpa olundu. İndiki halda adı "qara siyahı"da olan şəxslərin Qarabağa daxil olması imkansızdır. Azərbaycan şəffaflığın tərəfdarıdır. Hesab edirik ki, mövcud problemlər yazılmalı, işıqlandırılmalıdır. Jurnalistlərin münaqişə bölgəsində fəaliyyətinə geniş şərait yaradılmalıdır ki, reallıq ortaya çıxsın. Bu məsələdə Azərbaycanın çəkinəcəyi, ehtiyat edəcəyi heç nə yoxdur. Biz haqlı tərəfik. 30 il ərzində torpaqlarımızın azadlığı uğrunda mübarizə apardıq, indi də işğaldan azad etdiyimiz ərazilərdə sürətli bərpa-quruculuq işləri həyata keçiririk. Ötən həftə sonu Şuşada Beynəlxalq Media Forumu keçirildi. 150 xarici KİV nümayəndəsi Şuşada həm erməni vandalizminin, barbarlığın izlərini gördü, həm də Azərbaycan hökumətinin apardığı abadlıq işlərinin şahidi oldu. O baxımdan düzgün olaraq hesab edildi ki, adı əvvəllər "qara siyahı"ya düşmüş 58 nəfər əcnəbi jurnalistə amnistiya verilsin. Ümid edirik, onlar bir daha yanlış addım atmazlar".
