Gələcəyin siyasi təşkilatı ağlın, texnologiyanın və ictimai enerjinin sintezi üzərində qurulacaq
"1990-cı illərin partiya modeli ilə fəaliyyət göstərmək cəhdi, əslində, zamanın çağırışlarını anlamamaq və yeni siyasi mədəniyyətə uyğunlaşmamaq deməkdir".
Bunu Sherg.az-a açıqlamasında Vəhdət Partriyasının sədr müavini Vasif Əfəndiyev deyib. Ekspert bildirib ki, gələcəyin siyasi partiyası ağlın, texnologiyanın və ictimai enerjinin sintezi üzərində qurulacaq:
"Partiyaya üzvlük artıq formal qeydiyyat deyil, etimad, dəyər və iştirak mədəniyyəti əsasında formalaşacaq. Yəni siyasi partiyaya üzvlük müstəqilliyimizin ilk illərində yaranan model bu günün tələbinə uyğun gəlmir. Partiya vəsiqələri, üzvlərinin sayının artırılması, üzvlük haqları, yerli təşkilatlarda keçirilən konfranslar bu gün üçün işlək deyil. Siyasi partiyalar, hətta əllərində bütün inzibati resuslar olan hakim partiyalar bu gün həmin prosesləri formal olaraq həyata keçirirlər. Bu, müasir dövrün sosial-siyasi tələbidir. Yeni nəsil partiya üzvü isə fərdi düşünən, sosial məsuliyyətli və rəqəmsal fəal vətəndaşdır. 1990-cı illərdə qurulmuş siyasi partiyalaşma modeli, yəni ideoloji şüarçılıq, lider-mərkəzli idarəetmə və inzibati resurslara söykənən mexanizm bu günün şəffaf və rəqəmsal cəmiyyətində artıq işləmir. Yeni nəsillər partiyanı hakimiyyət qazanmaq vasitəsi kimi deyil, ictimai dəyərlərin həyata keçirildiyi platforma kimi qavrayırlar. Yeni dövrdə partiya üzvü sadəcə formal üzv deyil, sosial məsuliyyətli, fərdi düşünən və rəqəmsal bacarıqlara malik aktiv vətəndaşdır. Belə bir siyasi model ənənəvi partiya strukturlarının şəffaf kommunikasiya, ictimai müşavirə və kollektiv intellekt prinsipinə keçidini zəruri edir".
Analitik əlavə edib ki, Böyük Britaniyada ənənəvi partiyalar on minlərlə aktiv üzvü deyil, onlayn dəstəkçiləri və kampaniya könüllüləri üzərindən fəaliyyət göstərir:
"2010-cu illərdən etibarən “digital membership” anlayışı formalaşıb. Yəni şəxs real üzv deyil, amma internet üzərindən partiyanın siyasətinə səs verə, ianə edə və sosial aksiyalara qoşula bilir. Almaniyada gənclərin partiya marağı azalır, onların yerinə vətəndaş təşəbbüsləri yaranır. Nəticədə formal üzvlük azalır, mövzuya əsaslanan siyasi fəallıq artır. Fransada gənclər, sosial media vasitəsilə məqsədyönümlü hərəkatlara üstünlük verirlər. ABŞ-də partiyaya rəsmi üzvlük anlayışı çox zəifdir, vətəndaşlar adətən seçici kimi qeydiyyatdan keçmə yolu ilə öz mənsubiyyətini göstərirlər. Burada ön planda fərdi liderə, kampaniyaya və dəyərlərə bağlılıq dayanır. ABŞ-də müasir siyasət partiya ideologiyasından çox, lider və ideya üzərində formalaşır".
