Valideynlərin özünü tənzimləmə bacarığı emosiyalarını idarə etməyə, reaksiyalarını tarazlamağa və problemləri daha düzgün həll etməyə kömək edir. Bu isə uşaqların özünəinamlı və emosional cəhətdən sağlam böyüməsində mühüm rol oynayır.
Sherg.az xəbər verir ki, valideynlər gündəlik həyatda müdirlərinə, iş yoldaşlarına və ya öz valideynlərinə qarşı narazılıqlarını çox vaxt ifadə etmədən daxilən yaşayırlar. Eyni vəziyyət uşaqlarda da baş verə bilər. Böyüklər bəzən uşaqların da qəzəbləndiyini, incidiyini və hisslərini ifadə etməyə ehtiyac duyduğunu unudurlar.
Mütəxəssislər valideynlərə uşağa reaksiya verməzdən əvvəl dərindən nəfəs almağı, vəziyyəti qiymətləndirməyi və sözlərini diqqətlə seçməyi tövsiyə edirlər.
Özünü tənzimləmə yanaşması valideynlərə uşaqları ilə münasibətlərini yaxşılaşdırmağa, sakit ünsiyyət qurmağa, düzgün davranış nümunəsi göstərməyə və problemləri daha effektiv həll etməyə imkan verir.
Uşağa qarşı anlayışlı və sakit davranmaq, ona güvən aşılamaq və hisslərini ifadə etməsinə şərait yaratmaq özünəinamının formalaşmasına kömək edir. Valideynlərin davranışları uşaqların gələcək münasibətlərinə də təsir göstərə bilər.
Bunun üçün valideynlər qəzəblərini uşaqların üzərinə tökməməli, həddindən artıq sərt reaksiyalardan çəkinməli və sözlərini diqqətlə seçməlidirlər. Uşaqlara emosiyalarını sağlam şəkildə idarə etməyi öyrətməyin ilk addımı böyüklərin öz davranışlarına nəzarət etməsidir.
